Шавкат Мирзиёев 22 апрель куни хизмат кўрсатиш соҳасини ривожлантириш масалалари бўйича видеоселектор йиғилиши ўтказади. Бу ҳақда Президент матбуот хизмати хабар берди.
Қайд этилишича, иқтисодиётнинг ушбу муҳим йўналишига жуда кенг имкониятлар яратилиши, жумладан, соҳа субъектларига катта миқдорда молиявий ресурслар тақдим этилиши кутилмоқда.
Эслатиб ўтамиз, Шавкат Мирзиёев 13 апрель куни ёшлар масалаларига бағишлаб видеоселектор ўтказиб, айрим раҳбарларнинг ёшлар масалаларига эътибори ҳалигача бугунги кун талаб даражасида эмаслигини қатъий таъкидлаганди, ёшлар билан ишлашни эплай олмаган бир қатор амалдорларни ишдан олганди.
Шунингдек, давлат раҳбари Савдо-саноат палатаси (ССП) раиси Адҳам Икромовга тадбиркор ёшлар билан ишлашни тизимли ташкил этмаган учун палатанинг Бухоро ва Сурхондарё вилоятларидаги раҳбарларини лавозимидан бўшатиш ҳақида топшириқ берганди.
Ундан аввал, кичик ва ўрта бизнесни қўллаб-қувватлаш ҳамда аҳоли бандлигини таъминлаш дастурини амалга ошириш чоралари юзасидан 8 апрель куни ўтказилган видеоселекторда Президент уч ой ичида сектор раҳбарлари тадбиркорлар билан ишлашда натижа қилмаса, ишдан олиниши ҳақида огоҳлантирганди, иккита вилоят ҳокими, прокурори ва ички ишлар бошлиғига ҳайфсан бериб, чорак якунигача ўзгариш бўлмаса, барчаси ишдан кетишини айтганди. Шунингдек, туман ва шаҳар сектор раҳбарлари кичик тадбиркорлар билан кунига 3 марта, керак бўлса, кечаси ҳам учрашиб, муаммоларини ҳал қилишини таъкидлаганди.
Изоҳ (0)