Тошкентда 8 ёшли бола болалар майдончасидаги темир сирпанчиқ босиб қолиши оқибатида воқеа жойида ҳалок бўлди. Бу ҳақда прокуратура ва Президент аппаратига очиқ хат ёзган марҳум боланинг отаси хабар берди, деб ёзмоқда Repost.
Маълум қилинишича, воқеа 17 апрель куни Бектемир туманининг «Сувсоз» мавзесида юз берган. 1-, 2-, 3-уйлар болалар майдончасида таъмирлаш ишлари олиб борилаётган бўлган. Аммо таъмирлаш ишлари хавфсизлик талабларига риоя қилмаган ҳолда олиб борилган, ободонлаштириш хизмати ходимлари иш жойи атрофини тўсиқлар билан ўраб қўймаган. Шу сабабли бола мустаҳкамлаб қўйилмаган сирпанчиққа тегиши оқибатида у қулаб, болани босиб қолган.
Ҳалок бўлган боланинг отасининг айтишича, маҳалла қўмитаси вакиллари тегишли тадбирларни олиб бормаган. Шунингдек, атрофи ўралмаган таъмирлаш жойида хавфсизлик ва тартибни назорат қилиб турувчи шахс бўлмаган. Натижада исталган бола таъмирлаш ишлари олиб борилаётган майдончага кириши мумкин бўлган.
Боланинг отасининг сўзларига кўра, содир бўлган воқеадан сўнг маҳалла қўмитаси оиладан хабар ҳам олмаган. «Қўшниларимнинг айтишича, прокуратура ва ҳокимиятдан келишди, лекин хотиним ҳозир карахт аҳволда, ҳеч ким билан гаплаша олмайди. Ўзим эса ишдан келаман-кетаман. Улар кейинроқ келишларини айтишди. Ҳеч қандай ҳамдардлик йўқ», — деган у.
Марҳум боланинг оиласи прокуратура ва Президент аппаратидан бу ишларни бажаришга жавобгар бўлган масъул шахсларга нисбатан чора кўришни сўрамоқда.
«Gazeta.uz»нинг маълум қилишича, ҳолат юзасидан Жиноят кодексининг 258-моддаси 2-қисми «а» банди (тоғ-кон, қурилиш ёки портлатиш ишлари хавфсизлиги қоидаларини бузиш одам ўлишига сабаб бўлиши) билан жиноят иши қўзғатилди. Тошкент шаҳар ИИББ бир қатор экспертизалар тайинланганлигини маълум қилган. Тергов ҳаракатлари давом этмоқда.
Изоҳ (0)