Toshkentda 8 yoshli bola bolalar maydonchasidagi temir sirpanchiq bosib qolishi oqibatida voqea joyida halok bo‘ldi. Bu haqda prokuratura va Prezident apparatiga ochiq xat yozgan marhum bolaning otasi xabar berdi, deb yozmoqda Repost.
Ma’lum qilinishicha, voqea 17-aprel kuni Bektemir tumanining “Suvsoz” mavzesida yuz bergan. 1-, 2-, 3-uylar bolalar maydonchasida ta’mirlash ishlari olib borilayotgan bo‘lgan. Ammo ta’mirlash ishlari xavfsizlik talablariga rioya qilmagan holda olib borilgan, obodonlashtirish xizmati xodimlari ish joyi atrofini to‘siqlar bilan o‘rab qo‘ymagan. Shu sababli bola mustahkamlab qo‘yilmagan sirpanchiqqa tegishi oqibatida u qulab, bolani bosib qolgan.
Halok bo‘lgan bolaning otasining aytishicha, mahalla qo‘mitasi vakillari tegishli tadbirlarni olib bormagan. Shuningdek, atrofi o‘ralmagan ta’mirlash joyida xavfsizlik va tartibni nazorat qilib turuvchi shaxs bo‘lmagan. Natijada istalgan bola ta’mirlash ishlari olib borilayotgan maydonchaga kirishi mumkin bo‘lgan.
Bolaning otasining so‘zlariga ko‘ra, sodir bo‘lgan voqeadan so‘ng mahalla qo‘mitasi oiladan xabar ham olmagan. “Qo‘shnilarimning aytishicha, prokuratura va hokimiyatdan kelishdi, lekin xotinim hozir karaxt ahvolda, hech kim bilan gaplasha olmaydi. O‘zim esa ishdan kelaman-ketaman. Ular keyinroq kelishlarini aytishdi. Hech qanday hamdardlik yo‘q”, — degan u.
Marhum bolaning oilasi prokuratura va Prezident apparatidan bu ishlarni bajarishga javobgar bo‘lgan mas’ul shaxslarga nisbatan chora ko‘rishni so‘ramoqda.
“Gazeta.uz”ning ma’lum qilishicha, holat yuzasidan Jinoyat kodeksining 258-moddasi 2-qismi “a” bandi (tog‘-kon, qurilish yoki portlatish ishlari xavfsizligi qoidalarini buzish odam o‘lishiga sabab bo‘lishi) bilan jinoyat ishi qo‘zg‘atildi. Toshkent shahar IIBB bir qator ekspertizalar tayinlanganligini ma’lum qilgan. Tergov harakatlari davom etmoqda.
Izoh (0)