Шаҳрисабздаги Оқсарой мажмуасига кириш нима сабабдан пулли эканига ойдинлик киритилди

«Шаҳрисабз» давлат музей-қўриқхонаси бош директори Наби Хушвақов ижтимоий тармоқларда Оқсарой мажмуасига кириш учун пул талаб қилинаётгани, бу пуллар қонуний асосда олинаётганига шубҳа уйғонаётгани ҳақида тарқалган хабарларга ойдинлик киритди, деб ёзади «Халқ сўзи Online».

Маълум қилинишича, бутун дунёда мавжуд тажрибага кўра, Самарқанд, Хива, Бухорода ҳам ҳар битта тарихий ёдгорлик музей-қўриқхона таркибига кирган ва албатта, пуллик хизмат кўрсатилади. Саёҳатчилардан тушган пулнинг 50 фоизи Республика маданий мерос департаментига кетади, қолган 50 фоизи тарихий маданий мерос объектларини таъмирлаш учун музей-қўриқхона ҳисобрақамида қолади. Таъкидланишича, ушбу пулларнинг бирор сўмини ҳам музей ходимига мукофот тарзида ёки ойлик маошига устама тарзида қўшиб бериб бўлмайди.

«Биз ҳам худди мана шундай республикадаги бошқа давлат музей- қўриқхоналари каби ишлаяпмиз. Ўзингиз ўйлаб кўринг, Самарқанддаги Регистон, Бибихоним мақбараси ёки Гўри Амир даҳмасига бепул кириб бўлмайдику», — дейди Наби Хушвақов.

Хушвақовнинг таъкидлашича, Шаҳрисабзда фақат музей-қўриқхонага кириш учун пул тўланади, бу пул эвазига экскурсия хизмати кўрсатилади. Масалан, битта гуруҳ 3 кишидан 15 кишигача бўлиши мумкин, шундай гуруҳга 45 минутлик маданий сервис хизмати кўрсатиш нархи 10 минг сўм. «Бу 10 минг сўм музей ходими чўнтагига тушмайди, у кассага тўланиб, музей ҳисоб-рақамига тушади ва моддий техника базасини мустаҳкамлаш учун сарфланади. Бундан ташқари бизда ҳар ойнинг биринчи якшанбасида барча фуқаролар учун музей-қўриқхонага кириш бепул. Талабалар ва ўқувчилар 2000 сўм, катталар 3000 сўм тўлашади, холос. Чет эллик фуқаролар 3 АҚШ доллари тўлашади», — дейди музей-қўриқхона директори.

Қайд этилишича, Самарқанд дарвозасидан кириш жойида келин-куёвлардан Шаҳрисабз ободонлаштириш департаменти 152 минг сўм пул олади. Наби Хушвақов бу пуллар нима сабабдан олинишини билмаслигини айтган. «Одатда бундай объектларга маданий сервис хизмати кўрсатилиши учун пул олинади. Шаҳрисабз ободонлаштириш департаменти қанақа маданий сервис хизмати кўрсатяпти, буни ҳам билмайман. Чунки у бизга алоқадор ташкилот эмас, Маданият вазирлигига қарамайди. Ана шу ҳолат ҳам саёҳатчиларни чалғитяпти», — дея ойдинлик киритади у.

Маълумот учун, 2019 йилда Ўзбекистон Президентининг ташаббуси билан музей Шаҳрисабз давлат музей қўриқхонасига айлантирилган. Вазирлар Маҳкамасининг 2021 йил 3 мартдаги «Моддий маданий мерос объектлари ва ЮНЕСКОнинг Умумжаҳон мероси рўйхатига киритилган ҳудудлар муҳофазасини кучайтириш чора-тадбирлари тўғрисида»ги қарорига асосан шаҳар ҳудудидаги ЮНЕСКО рўйхатига кирган 220 гектар қалъанинг ичи, тарихий ҳудуди ва унинг 82 гектарлик муҳофаза ҳудуди жами 300 гектардан зиёд тарихий ҳудуд «Шаҳрисабз» музей-қўриқхона тасарруфига оператив бошқарув ҳуқуқи билан ўтказиб берилган.