19 апрель куни Тошкентнинг Олмазор туманида содир бўлган йўл-транспорт ҳодисаси оқибатида икки киши ҳалок бўлди. Бу ҳақда пойтахт ИИББ ахборот хизмати хабар берди.

Фото: Тошкент шаҳар ИИББ ахборот хизмати

Кўнгилсиз ҳодиса Беруний кўчасидаги «Тинчлик» метро станцияси яқинида соат 23:30 ларда содир бўлган — 23 ёшли Абдулло З. бошқарувидаги Nexia-3 ва 25 ёшли Бунёд Н. бошқарувидаги Matiz аварияга учраган.

Nexia ҳайдовчиси турли тан жароҳати билан шифохонада вафот этган, машина ичида бўлган 24 ёшли йўловчи ҳам шифохонага етказилган. Matiz ҳайдовчиси эса воқеа жойида вафот этган.

Фото: Тошкент шаҳар ИИББ ахборот хизмати

ИИББ маълумотларга кўра, авария Nexia ҳайдовчисининг тезликни меъёридан оширгани оқибатида юзага келган бўлиши мумкин. Бунинг натижасида енгил машина қарама-қарши йўналишга чиқиб кетиб, иккинчи автомобилга тўқнашган.

Ҳолат юзасидан Жиноят кодексининг 266-модда (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми билан жиноят иши қўзғатилган. Тергов ҳаракатлари олиб борилмоқда.

Аввалроқ Сирдарёда Nexia ва икки юк машинаси иштирокидаги ЙТҲ натижасида икки киши вафот этгани, Навоийда Nexia уриб юборган велосипед ҳайдовчиси шифохонада вафот этгани, Тошкентда Malibu ва Lacetti тўқнашуви оқибатида Озарбайжон фуқароси вафот этгани ҳамда Фарғонада Lacetti йўлни кесиб ўтаётган 12 ёшли велосипедчини уриб кетгани ҳақида хабар берилганди.