Халқ депутатлари Улуғнор тумани Кенгашининг навбатдан ташқари олтинчи чақириқ йигирма иккинчи сессиясида Муҳаммадисломиддин Аҳмаджонов туман ҳокими этиб тайинланди. Бу ҳақда «Дарё» мухбири Умиджон Мамарасулов хабар берди.
Муҳаммадисломиддин Аҳмаджонов 1979 йилда Шаҳрихон туманида туғилган бўлиб, 2000 йилда Тошкент давлат юридик институтини, 2012 йилда Ўзбекистон Республикаси Бош прокуратурасининг Олий ўқув курсларини тамомлаган.
Иш фаолиятини Тошкент шаҳар ҳокимлиги Адлия бошқармаси катта назоратчилигидан бошлаган Аҳмаджонов Асака шаҳар коммунал фойдаланиш бошқармаси ҳуқуқшуноси, Избоскан туман прокуратураси терговчиси, вилоят прокуратураси иқтисодий жиноятчилик ва коррупцияга қарши кураш бўлими алоҳида муҳим ишлар бўйича терговчиси, судларда жиноят ишлари кўрилишида прокурор ваколатини таъминлаш бўлими бошлиғи, Марҳамат ва Тўрақўрғон туманлари прокурори лавозимларида фаолият кўрсатган.
2020 йилдан буён эса Улуғнор тумани прокурори вазифасида ишлаб келаётган эди.
Аввалроқ 13 апрель куни Президент Шавкат Мирзиёев раислигида ёшлар масалаларига бағишлаб ўтказилган видеоселектор йиғилишда Улуғнор туманини шу кунгача бошқариб келган Дониёр Мақсудов ёшлар билан ишлашни лозим даражада ташкил этмагани учун лавозимидан озод этилиши эълон қилинган эди.
«Дарё» мухбирининг қўшимча қилишича, Улуғнорнинг янги ҳокими вилоятда прокуратура тизимидан чиққан ягона ҳоким бўлиб турибди. Прокурорларнинг ҳокимликка тайинланиши Қашқадарё вилоятида 2018 йил бошланган бўлиб, дастлабки прокурор — ҳоким Қамаши туманида иш бошлаган Шерали Санаев эди. Кейинчалик Ғузорга туман прокурори Бекзод Суюнов, Шаҳрисабз туманига эса Муборак тумани прокурори Самад Ҳасанов ҳоким этиб тайинланганди.
Изоҳ (0)