“Shahrisabz” davlat muzey-qo‘riqxonasi bosh direktori Nabi Xushvaqov ijtimoiy tarmoqlarda Oqsaroy majmuasiga kirish uchun pul talab qilinayotgani, bu pullar qonuniy asosda olinayotganiga shubha uyg‘onayotgani haqida tarqalgan xabarlarga oydinlik kiritdi, deb yozadi “Xalq so‘zi Online”.
Ma’lum qilinishicha, butun dunyoda mavjud tajribaga ko‘ra, Samarqand, Xiva, Buxoroda ham har bitta tarixiy yodgorlik muzey-qo‘riqxona tarkibiga kirgan va albatta, pullik xizmat ko‘rsatiladi. Sayohatchilardan tushgan pulning 50 foizi Respublika madaniy meros departamentiga ketadi, qolgan 50 foizi tarixiy madaniy meros obyektlarini ta’mirlash uchun muzey-qo‘riqxona hisobraqamida qoladi. Ta’kidlanishicha, ushbu pullarning biror so‘mini ham muzey xodimiga mukofot tarzida yoki oylik maoshiga ustama tarzida qo‘shib berib bo‘lmaydi.
“Biz ham xuddi mana shunday respublikadagi boshqa davlat muzey- qo‘riqxonalari kabi ishlayapmiz. O‘zingiz o‘ylab ko‘ring, Samarqanddagi Registon, Bibixonim maqbarasi yoki Go‘ri Amir dahmasiga bepul kirib bo‘lmaydiku”, — deydi Nabi Xushvaqov.
Xushvaqovning ta’kidlashicha, Shahrisabzda faqat muzey-qo‘riqxonaga kirish uchun pul to‘lanadi, bu pul evaziga ekskursiya xizmati ko‘rsatiladi. Masalan, bitta guruh 3 kishidan 15 kishigacha bo‘lishi mumkin, shunday guruhga 45 minutlik madaniy servis xizmati ko‘rsatish narxi 10 ming so‘m. “Bu 10 ming so‘m muzey xodimi cho‘ntagiga tushmaydi, u kassaga to‘lanib, muzey hisob- raqamiga tushadi va moddiy texnika bazasini mustahkamlash uchun sarflanadi. Bundan tashqari bizda har oyning birinchi yakshanbasida barcha fuqarolar uchun muzey-qo‘riqxonaga kirish bepul. Talabalar va o‘quvchilar 2000 so‘m, kattalar 3000 so‘m to‘lashadi, xolos. Chet ellik fuqarolar 3 AQSh dollari to‘lashadi”, — deydi muzey-qo‘riqxona direktori.
Qayd etilishicha, Samarqand darvozasidan kirish joyida kelin-kuyovlardan Shahrisabz obodonlashtirish departamenti 152 ming so‘m pul oladi. Nabi Xushvaqov bu pullar nima sababdan olinishini bilmasligini aytgan. “Odatda bunday obyektlarga madaniy servis xizmati ko‘rsatilishi uchun pul olinadi. Shahrisabz obodonlashtirish departamenti qanaqa madaniy servis xizmati ko‘rsatyapti, buni ham bilmayman. Chunki u bizga aloqador tashkilot emas, Madaniyat vazirligiga qaramaydi. Ana shu holat ham sayohatchilarni chalg‘ityapti”, — deya oydinlik kiritadi u.
Ma’lumot uchun, 2019-yilda O‘zbekiston Prezidentining tashabbusi bilan muzey Shahrisabz davlat muzey qo‘riqxonasiga aylantirilgan. Vazirlar Mahkamasining 2021-yil 3-martdagi “Moddiy madaniy meros obyektlari va YuNESKOning Umumjahon merosi ro‘yxatiga kiritilgan hududlar muhofazasini kuchaytirish chora-tadbirlari to‘g‘risida”gi qaroriga asosan shahar hududidagi YuNESKO ro‘yxatiga kirgan 220 gektar qal’aning ichi, tarixiy hududi va uning 82 gektarlik muhofaza hududi jami 300 gektardan ziyod tarixiy hudud “Shahrisabz” muzey-qo‘riqxona tasarrufiga operativ boshqaruv huquqi bilan o‘tkazib berilgan.
Mavzuga doir: Imom Buxoriy majmuasiga kirish pulli bo‘ldimi?
Izoh (0)