19 апрель куни Самарқанд вилояти Пастдарғом тумани яшовчи эркак маст ҳолда қайнонасини ўроқ билан уриб ўлдирди. Бу ҳақда вилоят прокуратураси хабар берди.
Маълум қилинишича, 19 апрель куни Пастдарғом туманида яшовчи А.Б. исмли эркак маст ҳолатда собиқ турмуш ўртоғининг Самарқанд тумани «Қайнама» МФЙдаги уйига фарзандини кўришга келган. Бироқ қайнонаси уни фарзанди билан учрашишига қаршилик қилгани оқибатида юзага келган ўзаро жанжал давомида А.Б. ўзи билан олиб келган ўроқ билан аёлнинг кўкрак ва бел соҳаларига қасддан урган.
Ҳаёт учун хавфли бўлган тан жароҳати етказилиши оқибатида жабрланувчи ҳодиса жойида вафот этган.
Дастлабки маълумотларга кўра, аёлнинг ўлими кўкрак ва бел соҳасига 12 маротаба тешиб ўтувчи санчилган-кесилган ярасидан ўткир қон йўқотишидан келиб чиққан.
Воқеа жойига вилоят прокурори, Самарқанд туман прокурори, туман ИИБ бошлиғи ҳамда бошқа тезкор тергов гуруҳи аъзолари етиб келган.
Самарқанд туман прокурори томонидан фуқаро А.Б.га нисбатан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилиб, у ҳимоя ҳуқуқи таъминланган ҳолда Жиноят-процессуал кодекснинг 221-моддаси тартибида ушланган.
Ҳозирда жиноят иши бўйича Самарқанд туман прокуратураси томонидан дастлабки тергов ҳаракатлари олиб борилмоқда. Жиноят иши тергови вилоят прокуратураси томонидан назоратга олинган.
Аввалроқ Термизда эр қизини кўришга тўсқинлик қилгани учун хотинига пичоқ ургани тўғрисида хабар берилганди.
Изоҳ (0)