Самарқанд вилоятига оилавий тадбиркорлик учун 900 млрд сўм кредит ажратилади

Самарқанд вилоятидаги ишсиз аҳоли сони 174 минг нафар бўлиб, 223 минг нафар фуқаро турли давлатларда муҳожирлик қилмоқда. Бу ҳақда айни пайтда Президент Шавкат Мирзиёев раислигида Самарқанд вилоятида ўтказилаётган вилоят фаоллари билан йиғилишда давлат раҳбари маълум қилди, дея хабар бермоқда «Дарё» мухбири.

«Вилоятда 174 минг нафар аҳоли ишсиз (иқтисодий фаол аҳолининг 11 фоизи), 223 минг фуқаро ишлаш учун хорижга кетган. Шуни ҳисобга олиб, Самарқандга Ишчи гуруҳи юбориб, маҳаллабай ва фуқаробай ишлаш ташкил этилди.

Жумладан, 1 минг 100 та маҳалланинг ҳар бирига бириктирилган банк ходимлари уйма-уй юриб, секторларда ташкил этилган Бошқарув офислари билан бирга, барча маҳаллаларни ривожлантириш дастурлари ишлаб чиқилди. Бунда, аввало аниқ фаолият турига ихтисослашган маҳаллалар ва хонадонлар тажрибасини кенг ёйишга алоҳида эътибор қаратиш зарурлиги маълум бўлди.

Масалан, Иштихондаги ‘Humo’ маҳалласида шафран, Булунғурдаги ‘Саховат’ маҳалласида картошка етиштириш, Пахтачидаги ‘Ёбу’, ‘Қувондиқ’, ‘Истиқбол’, ‘Кўрпа’ маҳаллаларида иссиқхона, Оқдарёда сабзавот уруғчилиги, Ургутда тўн ва дўппи тикиш, Каттақўрғон туманида қулупнайчилик, Пастдарғомда мебелсозлик, Самарқанд туманида кўкат етиштиришга ихтисослашган хонадонлар тажрибасини бошқаларга ҳам ўргатиш керак. Айниқса, хизмат кўрсатиш деярли мавжуд бўлмаган маҳаллаларда, турли хил хизмат кўрсатиш объектларини ташкил этиш лозим.

Марказий банк раиси банклар билан бирга вилоятда оилавий тадбиркорлик учун режалаштирилган 625 миллиард сўм ўрнига, 900 миллиард сўм кредит ажратилишини ташкил этади», — деди давлат раҳбари.

Аввалроқ Шавкат Мирзиёев Ўзбекистонда Маҳаллабай ишлаш маркази ташкил этилишини маълум қилгани тўгрисида хабар берилганди.