Қашқадарёда 360 нафар қарздор фуқарога қидирув эълон қилинди

Қашқадарё вилоятида 360 нафар қарздор фуқаро ва қарздор фуқароларга тегишли бўлган 324 та автомобилга қидирув эълон қилинди. Бу ҳақда «Дарё»га МИБ Қашқадарё вилоят бошқармаси ахборот хизмати раҳбари Гулноза Дилмуродова хабар берди.

Таъкидланишича, қидирувга берилган шахслардан 99 нафари топилган бўлиб, уларнинг 96 нафари алимент тўламаслик учун қочиб юрган.

Бюронинг вилоят бошқармаси қидирув шўъбаси томонидан олиб борилган тезкор тадбирлар давомида қидирувдагиларнинг 99 нафари (9 таси бошқа вилоятлардан) топилган. Улардан 96 нафари алиментдан қарздорлиги мавжуд экани аниқланган.

Давлат ижрочилари томонидан ушбу фуқароларнинг 22 нафарига маъмурий жавобгарлик масаласи кўриб чиқилиб, қамоқ жазоси қўлланилган бўлса, 74 нафаридан қарздорлиги учун 153,5 миллион сўм миқдорида қарздорлик ундирилган.

«Шунингдек, қарздор фуқароларга тегишли бўлган 324 та автотранспорт воситаси қидирувга берилиб, улардан 119 таси топилган ҳамда 250 миллион сўм жарима ундирилган», — дейди Гулноза Дилмуродова.