Ўзбекистон давлат кадастрини баҳолаш тизимини яратиш ва солиқ бошқарув тизимини ривожлантириш учун Россиядан техник ёрдам жалб қилди. Бу ҳақда Молия вазирлиги матбуот хизмати хабар берди.
Ўзбекистон ва Россия ўртасида иккита идоралараро битим 14 апрель куни Тошкентда имзоланди. Унда Россия давлат рўйхатга олиш, кадастр ва картография федерал хизмати ва Молия вазирлиги иштирок этди.
Вазирлик хабарида айтилишича, ушбу ҳужжатлар Россия томонидан Ўзбекистонга солиқ маъмурияти тизимини ривожлантириш, шу жумладан, кўчмас мулкни солиққа тортишни такомиллаштириш ҳамда солиқ тўловчилар билан ишлаш тизимини яратиш мақсадида бепул техник ёрдам кўрсатиш тўғрисидаги 2019—2020 йиллардаги битим доирасида амалга оширилган ишларнинг давомидир.
«Gazeta.uz»нинг Россия ҳукумати матбуот хизматига таяниб ёзишича, ҳамкорликнинг биринчи босқичида учта йўналиш — солиқ маъмуриятининг бизнес-жараёнларини реинжиниринг қилиш, солиқ тўловчилар билан ишлашнинг мижозга йўналтирилган тизимини яратиш ва кўчмас мулкни солиққа тортиш тизимини такомиллаштириш бўйича таклифларни тайёрлаш бўйича ишлар якунланди.
Бизнес жараёнларни реинжиниринг қилиш доирасида Россия томони Ўзбекистон солиқ органларининг автоматлаштирилган ахборот тизимини модернизасия қилиш концепциясини ишлаб чиқди. Бизнес жараёнларини лойиҳалаш ва моделлаштириш методологиясини ўтказди ва бизнес жараёнларни тавсифлади. Дастурдан тажрибали фойдаланиш мақсадида Россияда ишлаб чиқарилган сервер ускуналари асосида тажриба стенди яратилди.
Ўзбекистон Давлат солиқ қўмитаси туман инспекциялари 166 нафар ходими алоқа ўрнатиш қоидалари ва солиқ тўловчилар билан ўзаро алоқалар техникаси бўйича Россияда ўқитилди. Ўзбекистон солиқ органларида солиқ тўловчилар билан ишлашни ташкил этиш концепцияси ишлаб чиқилди. Солиқ тўловчилар билан ўзаро муносабатларнинг амалдаги модели ҳар томонлама таҳлил қилинди.
Кўчмас мулкни солиққа тортиш тизимини такомиллаштириш бўйича ишлар доирасида мол-мулкни солиққа тортиш бўйича амалдаги тизим, шу жумладан, мол-мулк объектларини рўйхатга олиш, ҳисобга олиш таҳлил қилинди. Ўзбекистонда кўчмас мулкни солиққа тортишни такомиллаштириш концепцияси ва уни амалга ошириш бўйича «йўл харитаси» ишлаб чиқилди.
Ҳамкорликнинг иккинчи босқичи, шунингдек, техник ходимлар учун тренингларни ташкил этиш ва ўтказиш, дастурий таъминотни синовдан ўтказиш ва амалга ошириш жараёнларини қўллаб-қувватлаш, Маълумотларни қайта ишлаш марказини Россияда ишлаб чиқарилган ИТ-ҳисоблаш инфратузилмаси билан жиҳозлаш, архитектура-техник назорат ва техник ходимлар консалтингини ўз ичига олади.
«Россия томонидан бериладиган технологиялар Ўзбекистонга бюджет тизимининг барқарорлигини, иқтисодиётнинг шаффофлигини оширишга ва ҳалол солиқ тўловчиларга нисбатан маъмурий босимни камайтиришга ёрдам беради», — дейилади хабарда.
Изоҳ (0)