Фарғона вилоятининг Қўқон шаҳрида яшовчи ота икки нафар фарзандига тўланиши лозим бўлган алимент ўрнига турмуш ўртоғига уй олиб берди. Бу ҳақда «Дарё»га МИБ вилоят бошқармаси ахборот хизмати хабар берди.
Маълум қилинишича, фуқаролик ишлари бўйича Қўқон туманлараро судининг 2021 йил 19 мартдаги қарори билан қарздор А.Т.дан ундирувчи Х.Т. фойдасига икки нафар вояга етмаган фарзандининг моддий таъминоти учун даромадининг учдан бир қисми миқдорида алимент ундириш лозимлиги белгиланган.
МИБнинг Қўқон шаҳар бўлими ходимлари томонидан мазкур ижро ҳужжати юзасидан фуқаро билан ҳуқуқий тушунтириш ишлари олиб борилган. Натижада А.Т. собиқ турмуш ўртоғи Х.Т. билан келишган ҳолда икки нафар фарзанди вояга етгунига қадар тўланадиган алимент пулларини олдиндан тўлиқ тўлаб беришини маълум қилган.
Тарафлар ўртасида нотариал тартибда келишув битими расмийлаштирилиб, 75 миллион сўм алимент тўлови ўрнига Қўқон шаҳридан икки хонали уй олиб берилиши белгиланган.
Фуқаролик ишлари бўйича Қўқон туманлараро суди томонидан мазкур келишув битими тасдиқланган ва Х.Т.га алимент ҳисобидан икки хонали уй ундириб берилган. Ундирувчи аризаси билан ушбу ижро ҳужжатининг иш юритуви тамомланган.
Изоҳ (0)