Forbes журналининг сайтида Мелик Кайлан томонидан ёзилган «Ғарб Россия ва Хитойга қарши тура олиши учун Ўзбекистонга ёрдам бериши керак» номли мақола эълон қилинди. Мақолада таъкидланишича, сўнгги 200 йил ичида биринчи бор Марказий Осиё ҳеч кимга тегишли эмас, Ўзбекистон эса минтақадаги мамлакатлар занжирида марказий бўғин ҳисобланади.
«Ипак йўли мамлакатларида, ушбу ‘манзилларъда ўз тақдирини ташқи кучли давлатлар таъсирисиз мустақил ҳал этишнинг реал имконияти пайдо бўлди. Бироқ бу жуда кучсиз имконият ва барча минтақавий ҳамда глобал кучлар бирлашиб, уларнинг ҳимоясига турмаса, бундан мосуво бўлишлари мумкин», — деб ёзади муаллиф.
Қайд этилишича, Марказий Осиёда ҳукмронликни қўлга киритадиган давлат арзон хом ашёдан эксклюзив фойдаланиш имконига эга бўлади, нефть ва газдан тортиб, олтин ва урангача.
Шу билан бирга, муаллифнинг фикрича, мазкур минтақадаги мамлакатларга Россия ва Хитой катта таъсир кўрсатиши мумкин. Аммо «ғарбий бўлмаган ҳукмронликнинг бундай зимистон муҳитида Ўзбекистон келажакка ягона умид бахш этмоқда».
Муаллифнинг мисол сифатида ёзишича, Ўзбекистон иқтисодий жиҳатдан Сингапур, Малайзия ёки Ҳиндистон каби Осиё мамлакатларининг моделини ўзида муваффақиятли амалга оширмоқда, бироқ шу билан бирга, қаттиқ экологик ва тарихий мезонларга амал қиляпти.
«Ўзбекистон шаҳар ва қишлоқларда «маслаҳат марказлари»нинг бутун бошли тармоғини очиб интерфаол бюрократиянинг инновацион шаклини шакллантирди. Одамлар у ерга бориб, адолатсизликдан шикоят қилиши ёки ғарбдаги маҳаллий ўзини ўз бошқариш қўмиталарига ўхшаш жамоатчилик йиғинларида иштирок этиши мумкин. Қонунбузилишлар ва суиистеъмол қилишлар қаерда мавжуд бўлса, одамлар бу ҳақда давлат томонидан ҳеч қандай назорат қилинмайдиган (Хитой ва Россиядан фарқли ўлароқ) ижтимоий тармоқлар орқали маълум қилади», — дейилади мақолада.
Шу билан бирга, давлат раҳбари бутун дунёдан, шу жумладан, Европа ва АҚШдан Ўзбекистонга инвестициялар кириб келишини кўмаклашади. Бу орқали хорижлик инвесторлар Ўзбекистоннинг позицияси мустаҳкамлигига қизиқиш билдириши ва унинг хавфсизлигини таъминлашга ёрдам бериши кутилмоқда.
Муаллифнинг сўзларига кўра, Ўзбекистон «география — бу тақдир» деган қоидадан воз кечишга уринаётган мамлакатга мисол бўла олади. У гегемонликнинг улкан кучлари соясида бўлиб, эркинлик ва мустақилликка интилмоқда.
«Ғарб ушбу мамлакатнинг муваффақиятини таъминлашга мажбур, ҳеч бўлмаганда совуқ уруш тугаганидан кейин бир неча бор шу каби иттифоқчиларга Москва босим ўтказганида қўллаб-қувватлашдан бош тортганимиз учун ҳам. Бу каби ҳар бир муваффақиятсизлик янги қўрқитишларга олиб келиши муқаррар. Аввалига Россия Грузияни қўрқитди. Бизнинг бунга пассив жавобимиз Россия Украинани қўрқитишни бошлаганига олиб келди. Афсуски, ўтмишдаги айнан шу муваффақиятсизликлар бизни иккиланишга, жасоратимизни тортиб олиб, олдинга қарашга мажбур қилади. Украина ва Тайван муаммоларига оддий ечим топишни истасак, Ўзбекистонни эътиборсиз қолдиришимиз керак эмас», — дейди муаллиф.
Изоҳ (0)