Лондонда истиқомат қилувчи Габриэлла Дуглас, Кембриж герцогиняси Кейт Миддлтонга ўхшашлиги сабаб бойиб кетди. Бу ҳақда The Sun нашри хабар берган, деб ёзади «Korrespondent.net».
Маълум қилинишича, қизининг Кейтга ўхшашлигига эътибор қаратган онаси, унга суратини агентликка юбориб кўришини айтган.
Габриэлла Уильямнинг рафиқаси (Кейт) сифатида кўриниш бергани учун кунига 650—1000 фунт стерлинг (900—1400 доллар атрофида) даромад топган. У қироллик оиласининг мухлислари томонидан ташкил қилинган турли тадбир ва зиёфатларга ташриф буюрган. Унинг хоббиси доимий ишидан кўпроқ маблағ олиб келган.
У турли кўнгилочар шоуларнинг суратга олиш жараёнида, оммавий тадбирлар, шунингдек, 2012 йил Лондонда бўлиб ўтган ёзги Олимпиада ўйинларида ҳам иштирок этган.
«Мен ҳатто 2014 йил апрелда сохта қироллик турида ҳам иштирок этганман», — деган Дуглас.
2016 йилда ўз шахсий бизнеси билан шуғулланишга қарор қилган қиз, Кейтга ўхшашлик ортидан пул топиш карьерасига нуқта қўйган. Топган даромадидан эса у Лондонда уй олишга муваффақ бўлган.
Ҳаётини яхшилангани учун Кейтдан миннатдорлигини билдирган Габриэлла, бугунги кунда эгизак фарзандларнинг онаси ҳисобланади.
Аввалроқ америкалик аёл Кейт Миддлтон каби кийиниш учун 30 минг доллар сарфлагани ҳақида хабар берилганди.
Изоҳ (0)