Шаҳрихонда маҳаллий аҳоли томонидан «Алвасти кўприк» деб аталувчи Шаҳрихонсой устидан ўтувчи кўприк ўрнига янгиси қурилди, деб хабар беради «Ўзбекистон темир йўллари» АЖ матбуот хизмати.
Маълум қилинишича, «Ўзбекистон темир йўллари» АЖга қарашли «Кўприкқурилиш» трести унитар корхонаси томонидан Андижон вилоятининг Шаҳрихон туманидаги «Қўрғонча» маҳалласида ўнлаб йиллар давомида ечими топилмаган муаммо бир ой давомида ҳал этилган — бу ердан оқиб ўтувчи Шаҳрихонсой канали устидан ўтувчи янги кўприк қад ростлаган.
Маҳаллий аҳоли томонидан ушбу кўприкка «Алвасти кўприк» номи берилган, чунки атиги бир ой олдин ҳам ҳатто ундан қандай ўтишни ўйлашнинг ўзи одамни қўрқувга солган. Эски кўприкдан фақат пиёдалар фойдаланган ва ушбу кўприк хавфсизлик талабларига умуман жавоб бермаган.
Ўзбекистон Президентининг ташаббуси билан «Ўзбекистон темир йўллари» АЖ янги қурилган кўприк нафақат пиёдалар учун, балки маҳаллий аҳолига янада қулайлик яратиш мақсадида автотранспорт воситалари ҳаракатланиши учун ҳам шароит яратилган. Мазкур иншоот 50-60 тоннагача бўлган юкни бемалол кўтара олиш имкониятига эга.
Мутахассисларнинг маълум қилишича, эни 7 метр, узунлиги 32 метрдан иборат ушбу темир-бетон кўприк 60-70 йил давомида халққа муаммосиз хизмат қилади.
Аввалроқ Қамашидаги ҳомиладор аёлларни олиб ўтиб бўлмайдиган жин кўприк 5,4 миллиард сўмга қайта қурилагани тўғрисида хабар берилганди.
Изоҳ (0)