Тайванлик эркак қурғоқчилик сабаб кўл тубидаги телефонини топиб олди. У смартфонни бир йил олдин тушириб юборган эди

Тайванда кучли қурғоқчилик сабаб эркак бир йил олдин кўлга тушириб юборган телефонини топишга муваффақ бўлди, деб ёзади Esquire.

Бир йил олдин Чен исмли эркак Сан Мун кўлида паддлбординг (доскада эшкак эшиш — таҳр.) билан шуғулланаётиб, телефонини йўқотиб қўйган. Ушбу кўл 2021 йилда қуриб қолган ва эркак смартфони учун қайтиб келиб, уни сув ўтказмайдиган ғилофи ичидан бус-бутун ҳолда топган.

Ченнинг телефонини қайтариб берган ишчининг сўзларига кўра, Сан Мун кўлидаги сув сатҳи сўнгги 50-60 йил ичида биринчи бор бу қадар камайиб кетган.

Экспертларнинг маълум қилишича, бу сўнгги 67 йил ичидаги энг кучли қурғоқчилик ҳисобланади. Бутун бошли дарё ўзани ва кўл қуриб кетган, ҳукумат сув ресурсларини тежаш мақсадида сув таъминотларини чекламоқда, «автомойка»лар ишламаяпти.

Аввалроқ ярим йил кўл остида ётган iPhone 11 барибир ишлашни давом этгани тўғрисида хабар берилганди.