Қашқадарёлик она ва унинг қизи — Х.З. ҳамда Т.И. Шаҳрисабз шаҳар тиббиёт бирлашмасига қарашли шифохона ва поликлиникаларга фуқароларни ишга жойлаштиришни ваъда қилиб, жами 11 нафар фуқарони чув туширган. Бу ҳақда Қашқадарё вилояти ИИБ ахборот хизмати хабар бермоқда.
Жабрланувчи фуқаролар она-болага бу хизматлари учун 100—700 АҚШ доллари берган. Суриштирувда улар 11 нафар фуқародан 4300 доллар олиб, ўз эҳтиёжи учун сарфлаб юборгани маълум бўлган.
Шунингдек, Т.И.нинг 2021 йил 1—2 апрель кунлари Шаҳрисабз шаҳар тиббиёт бирлашмаси бош шифокори ва котибаси ҳамда кўп тармоқли поликлиника бош шифокорларига телефон орқали ўзини мансабдор шахс сифатида таништириб, SMS хабар ёзиб, юқоридаги фуқароларнинг исм-фамилиясини ёздириб, ишга қабул қилишини талаб қилгани аниқланган.
Айни пайтда мазкур ҳолат юзасидан Шаҳрисабз шаҳар ИИБ тергов бўлими томонидан жиноят иши қўзғатилиб, дастлабки тергов ҳаракатлари олиб борилмоқда.
Бундан аввал Фарғонада 1200 доллар эвазига фуқаронинг паспортидаги исми ва туғилган йилини ўзгартириб беришни ваъда қилган шахс ушлангани, Навоийда ўзига тегишли бўлмаган ерни 150 минг долларга сотмоқчи бўлган мансабдор шахс қўлга олингани ҳамда СамДУда декан ўринбосари талабадан 500 доллар пора олаётганда қўлга тушгани ҳақида хабар берилганди.
Изоҳ (0)