Samarqand davlat universitetida dekan o‘rinbosari 500 dollar pora bilan qo‘lga tushdi. Bu haqda IIV Tergov departamenti xabar berdi.

Foto: IIV Tergov departamenti

Ma’lum qilinishicha, 30-mart kuni viloyat IIB JQB korrupsiya va iqtisodiy jinoyatlarga qarshi kurashish bo‘limi va DXX Samarqand viloyati boshqarmasi xodimlari bilan hamkorlikda Samarqand shahar pedagogika kolleji binosining kirish qismida tezkor tadbir o‘tkazilgan.

Tadbir davomida SamDUning san’atshunoslik fakulteti dekani o‘rinbosari lavozimida ishlovchi 35 yoshli Sh.P. o‘zining xizmat vazifasidan foydalanib, ushbu fakultetning 1-bosqich talabasi bo‘lgan Sh.I.ning psixologiya fanidan oraliq nazorati imtihonini ijobiy hal qilishi va uni yakuniy imtihonga kiritishi evaziga 500 dollarni tadbir ishtirokchisi B.B.dan olgan vaqtida ushlangan.

Tezkor tadbir davomida dekan o‘rinbosaridan olingan 500 dollar pul ashyoviy dalil tariqasida rasmiylashtirib olingan.

Holat yuzasidan Samarqand shahri bo‘yicha IIO FMB huzuridagi Tergov bo‘limi tomonidan Sh.P.ga nisbatan Jinoyat kodeksining 168-moddasi 3-qismi “v” bandi (xizmat mavqeyidan foydalanib firibgarlik sodir etish) bilan jinoyat ishi qo‘zg‘atilib, protsessual tartibda ushlangan.

Hozirda tergov harakatlari olib borilmoqda.

Avvalroq Qo‘qon davlat pedagogika institutiga o‘qishga kiritib qo‘yishni va’da qilib, 3 ming dollar olgan dekanga sud hukmi o‘qilgani haqida xabar berilgan edi.