Навоий вилояти Хатирчи туманида 7,2 тонна суюлтирилган газни талон-торож қилаётган шахслар ушланди, дея хабар бермоқда Бош прокуратура ҳузуридаги Департамент матбуот хизмати.
Қайд этилишича, Департамент, ДХХ ҳамда ИИБнинг Навоий вилояти бошқармалари томонидан ўтказилган тезкор тадбирда «Хатирчи-Учқара» газ тўлдириш шохобчаси мансабдор шахслари фуқаро С.А.га аҳоли истеъмоли учун ажратилган 7,2 тонна суюлтирилган газни ҳар бир килограммини 2,5 минг сўмдан ҳисоблаб, 300 АҚШ доллари ва 14,9 миллион сўмга сотган вақтида ашёвий далиллар билан ушланган.
Бундан ташқари, шохобча мансабдор шахслари умумий қиймати 16,2 миллион сўмлик 5 тонна суюлтирилган газни ҳисоботларга қўшиб ёзиш орқали ортиқча чиқим қилиб, ўзлаштириш йўли билан талон-торож қилганлиги аниқланган.
Мазкур ҳолат юзасидан Жиноят кодексининг 167-моддаси (талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Бундан аввал Андижонда 50 нафар кам таъминланган фуқарога ажратилган маблағлар талон-торож қилингани, Андижонда «Агробанк» ходими 219,5 миллион сўмни талон-торож қилгани ҳамда Бухорода фуқаролар номига расмийлаштирилган 215 миллион сўм микроқарзни ўзлаштирган МЧЖ раҳбари ва банк ходимига жиноят иши қўзғатилгани ҳақида хабар берилганди.
Изоҳ (0)