АҚШ Мудофаа вазирлиги қуролли кучларнинг яқин ўн йилликларда дунёда эҳтимолий можароларга жанговар тайёргарлигини оширишда ўз мақсадларига эриша олмади. Бу ҳақда АҚШ Молиявий назорат бошқармасининг (GАО) баённомасига таяниб, Military Times газетаси хабар берди, деб ёзмоқда «ТАСС».
Баённома муаллифларининг ҳисоб-китобларига кўра, 2017 йилдан 2019 йилгача махсус таркиб ва ҳарбий-техник жиҳозлар бўйича қўшинларнинг жанговар тайёргарлиги фақат қуруқликдаги кучлар учун оширилди, денгиз кучларида бу йўналиш бўйича самарадорлик тушиб кетди, шунингдек, белгиланган вазифалар авиация, космик ва кибернетик кучлар томонидан ҳам бажарилмаган. Баёнотда ёзилишича, жами 19 та минтақада жанговар топшириқларни бажариш учун ресурсларнинг мавжудлиги ва тайёрлиги каби вазифалар тугалланмаган.
«Мудофаа вазирлиги бешта йўналишнинг (қуруқлик, сув, ҳаво, коинот, кибердунё) ҳар бири бўйича тезкор тайёргарликни таъминлашда дуч келадиган муаммоларнинг рўйхатини тақдим этди. Хусусан, ҳарбий денгиз қўшинларида (ҲДҚ) хусусий ва федерал кемасозлик заводларидаги кемаларга техник хизмат кўрсатиш имкониятининг чекланганлиги кемалар ва сувости кемаларининг жанговар тайёргарлигини тиклашдаги асосий муаммо сифатида кўрсатилди», — дейилади баёнотда.
Баёнот муаллифлари, аслида, 2016 йилдаги шу каби текширув натижасида берилган тавсияларни такрорлаб, Пентагон раҳбариятига ўз бўлинмалари учун жанговар тайёргарликни ошириш соҳасида аниқ вазифаларни белгилаб олишни маслаҳат берди.
Military Times газетасининг ёзишича, Мудофаа вазирлиги текширув бўлими баёнотининг хулосаларини тўлиқ маъқуллашини билдирди.
Аввалроқ АҚШ ҳарбий ҳаво кучларининг AGM-183A ARRW гипертовушли ракетаси синовлари муваффақиятсиз тугагани маълум қилинганди. Ракета Boeing B-52 Stratofortress бомбардимончи самолётидан учирилиши керак эди. «Бироқ ракета учиш тартибини якунлай олмади ва самолётда қолиб кетди. Самолёт ракета билан Калифорниядаги Edvards авиабазасига қайтиб келди», — дейилади АҚШ ҳарбий ҳаво кучлари баёнотида.
Изоҳ (0)