Ўзбекистон товар-хом ашё биржасида Аи-80 бензини нархи 0,2 фоизга ошди

Ўзбекистон товар-хом ашё биржасида Аи-80 маркали бензин нархи 0,2 фоизга кўтарилди, дея хабар бермоқда биржа матбуот хизмати.

«Ўзбекистон республика товар-хом ашё биржаси»га 29 мартдан 4 апрелгача бўлган муддатда 33 222,0 тонна Аи-80 маркали автомобиль бензини қўйилди ва улардан 11 815,5 тоннаси, яъни 35,6 фоизи сотилди. Ўтказилган савдоларда ҳар куни ўртача 28 нафар харидор иштирок этди.

Кўриб чиқилаётган даврда Аи-80 маркали автомобиль бензинининг ўртача кунлик нархи бир тоннаси учун 6273,6 минг сўмдан 6283,4 минг сўмгача, яъни 0,2 фоизга кўтарилди.

Кўриб чиқилаётган даврда Аи-80 маркали автомобиль бензинининг ўртача ҳафталик котировкаси 6301,6 минг сўмни, Аи-91 7440,5 минг сўмни ташкил этди.

Маълумот учун, турли манбаларда келтирилишича, автомобиль бензинининг бир тоннаси ўртача 1293—1370 литрни ташкил қилади.

Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг 1 майдан дизель ёқилғиси нархи 500 сўмга пасайиб, 6500 сўм қилиб белгиланган. 3 майдан бошлаб эса Аи-80 бензинининг нархи 500 сўмга пасайиб, бир литри 4000 сўмдан сотила бошлаган. 2020 йилнинг декабрида мазкур маркадаги бензиннинг ўртача бошланғич нархи 2,6 фоизга кўтарилганди. 2021 йилнинг январь ойи охирларида Аи-80 бензини нархи 110 сўмга қимматлашиши мумкинлиги хабар қилинган.