«Президентлар автомобили»дан тортиб тез ёрдам машиналаригача: Тошкентдаги «Иннопром» кўргазмасида намойиш этилган автомобиллар (фото)

7 апрель куни «Ўзэкспомарказ» кўргазмалар мажмуасида икки кун давом этган «Иннопром—2021» халқаро саноат кўргазмаси ўз ишини якунлади. Кўргазма мулоқотлар майдончасида ҳамкорлик учрашувларига бой бўлди.

Ташкилотчилар — Россия Саноат ва савдо вазирлиги ҳамда Ўзбекистон Инвестициялар ва ташқи савдо вазирлиги. Кўргазма ишида Ўзбекистон, Россия, Қозоғистон, Қирғизистон, Тожикистон, Туркманистон, Афғонистон ва Покистондан саккиз мингдан зиёд давлат органлари ҳамда йирик компаниялар вакиллари иштирок этди.

Тадбир доирасида «Рақамлаштирилган саноат», «Машинасозликдаги қўшма лойиҳалар», «Саноатни молиялаштириш», «Йирик шаҳарлар учун инновацион технологиялар», «Энергетика соҳасида инновациялар» номли ихтисослаштирилган сессиялар ташкил этилган бўлиб, унда иштирокчилар саноатнинг деярли барча тармоқларида илғор технологиялар эвазига эришилаётган ютуқлар, замонавий ечим ва дизайнга эга янги турдаги маҳсулотларни ишлаб чиқариш, уларни саноатда кенг фойдаланишга татбиқ этиш, савдо-сотиқ масалалари юзасидан фикр алмашиш имконига эга бўлди.

300 дан ортиқ иштирокчи компаниялар икки кун давомида учрашиш, танишиш, турли келишув ва битимлар имзолаш имкониятига эга эди. 200 дан ортиқ экспонентлар ўз маҳсулотларини намойиш этди. Кўргазманинг мулоқот майдончасида 200 дан ортиқ ишбилармонлик учрашувлари, тематик сессиялар ва давра суҳбатлари, бизнес лойиҳалар тақдимотлари ташкил қилинди.

Энг катта эътибор, шубҳасиз, бу ерда намойиш этилган транспорт воситалари, автомобиллар, саноат, қишлоқ хўжалиги техникаларига қаратилди.

Кўргазманинг иккинчи залида тақдим этилган Aurus автомобили ташриф буюрувчиларда ҳақиқий катта қизиқиш уйғотди. Ушбу автомобиль нолдан яратилган премиум автомобилларнинг илк Россия бренди. Уларнинг ичида лимузин, седан, йўлтанламас ва минивенлар бор. Лойиҳа 2014 йилда ишга туширилган. Aurus автомобиллари давлат раҳбарларига мўлжалланган бўлиб, ушбу савдо белгисининг лимузинидан Россия президенти Владимир Путин ҳам фойдаланади.

Бундан ташқари, кўргазмада «ГАЗ», «КамАЗ» ва «АвтоВАЗ»нинг автобуслари, тез ёрдам машиналари, махсус техника ва юк машиналарини кўриш мумкин.