Farg‘ona viloyati Qo‘qon shahar hokimi Marufjon Usmonov “2-Shaldiramoq” mahallasida obodonchilik hasharida qatnashib, nochor xonadonga yordam berdi. Bu haqda “Xalq so‘zi online” xabar berdi.

Foto: “Xalq so‘zi online”

Ma’lum qilinishicha, shaharning Bahmalbop ko‘chasi, 57-xonadonda istiqomat qiladigan Soliyevlar uyida o‘tkazilgan o‘rganish natijasida bir uy, bir dahliz va oshxona qurilishi boshlab yuborilgan. “Ishsiz oila a’zolari ishga joylashtirilib, doimiy daromad manbasi bilan ta’minlandi. Oilaning katta o‘g‘li Hasanjon Soliyevning to‘y marosimini homiylik asosida o‘tkazishga kelishib olindi va to‘yga tayyorgarlik ishlari boshlab yuborildi”, — deyiladi xabarda.

Foto: “Xalq so‘zi online”

Marufjon Usmonov mahallani obodonlashtirish ishlarida ishtirok etib, uylarning devorlarini, daraxtlarni oqlagan.

Mahalla faollari shahar hokimi bilan bo‘lib o‘tgan uchrashuvda “Obod mahalla” dasturi doirasidagi ishlarda faol ishtirok etishlarini bildirgan.

Foto: “Xalq so‘zi online”

Foto: “Xalq so‘zi online”

Eslatib o‘tamiz, Prezident Shavkat Mirziyoyev 19-fevral kuni Namangan viloyatiga tashrifi chog‘ida “Bunyodkor” mahallasida bo‘lgan va ichimlik suvi yo‘q, ichki yo‘llar yomon, atrof obodonlashtirilmagan hududdagi ahvol uchun shahar hokimi va prokuroriga tanbeh bergandi.