Саудия Арабистони Ҳаж масалалари бўйича вазирлиги 5 апрель куни маълум қилишича, мамлакат ҳукумати Рамазон ойида COVID-19’га қарши эмланган зиёратчиларга муқаддас қадамжоларга ташриф буюриш учун рухсат беради. Бу ҳақда Al-Arabiya телеканали хабар берди, деб ёзади «Интерфакс».
Унинг маълумотларига кўра, вазирлик аниқлик киритишича, зиёрат сафари учун рухсат олишни истаганлар коронавирусга қарши вакцинанинг иккита дозасини қабул қилиши керак, рухсатнома махсус мобил дастурдаги «эмланган» статуси асосида берилади. Таъкидланишича, бундай шарт COVID-19’дан соғайгандан кейин эмланганларга ҳам тегишлидир.
Маккага кичик ҳаж — Умра зиёратини амалга ошириш, мунтазам намоз ўқишлар ёки муқаддас жойларга ташриф буюриш учун ариза бермоқчи бўлганлар махсус дастурлар орқали рўйхатдан ўтиши ва бўш вақт оралиқларини банд қилиб қўйиши керак.
Вазирликда маълум қилишларича, Рамазон ойи мобайнида ислом дунёси учун асосий бўлган Маккадаги Ал-Ҳаром масжидида зиёратчиларни қабул қилиш имкониятлари оширилади. Айни вақтда у ерда коронавирус тарқалишига йўл қўймаслик бўйича чоралар амал қилади.
Эслатиб ўтамиз, 2020 йил март ойи ўрталарида Саудия Арабистони подшоҳлигида жамоат намозлари вақтинча тўхтатилган ва фақат иккита — Макка ҳамда Мадинадаги масжидда жамоат бўлиб намоз ўқишга рухсат берилганди. Бироқ кейинчалик коронавирус тарқалиши хавфи сабаб Ал-Ҳаром ва Набавий Масжидда ҳам намоз ўқиш тўхтатилган. 23 март куни Саудия Арабистонида комендантлик соати жорий этилган, 24 март куни мамлакатда коронавирус билан боғлиқ биринчи ўлим ҳолати қайд этилган. Шунингдек, мамлакатда аҳоли ҳамда хорижлик зиёратчилар учун Умра зиёратини амалга ошириш тадбирлари ҳам номаълум муддатга қолдирилганди.
2020 йил 7 апрелда Саудия Арабистони Рамазон ойида масжидларни очишни режалаштирмаётгани айтилган, 13 апрель куни Рамазон ойида Саудия Арабистонида таровеҳ намозлари уйда ўқилиши ҳақида фатво берилгани хабар қилинган, кейинчалик шу куни Ўзбекистон мусулмонлари идорасининг Рамазон ойини ўтказиш ҳақидаги баёнотида таровеҳ намозларини уйда ўқиш тавсия қилинди. 18 апрель куни Тожикистонда масжидлар яна ёпилгани, жума ва таровеҳ намозлари масжидларда ўқилмаслиги, ушбу чоралар коронавируснинг тарқалишини олдини олиш мақсадида амалга оширилгани ҳақида хабарлар тарқалди. Саудия Арабистонида комендантлик соати 21 июндан бекор қилинган, бироқ шунга қарамай, кўплаб чекловлар ўз кучида қолган.
Саудия Арабистони 2020 йил октябрь ойидан бошлаб мамлакатда яшовчи аҳолиси учун Умра зиёратини амалга оширишга рухсат берган эди. Ва ўша ой ўрталарида мамлакат ҳукумати етти ой ичида биринчи марта Маккадаги Ал-Ҳаром масжидида намоз ўқилишига рухсат берди.
Ўтган йил ноябридан Саудия Арабистони аста-секинлик билан 50 ёшдан катта бўлмаган зиёратчиларни манфий натижали ПЗР-тест билан Умра зиёрати учун киритишни бошлади.
Аввалроқ Саудия Арабистони коронавирусга қарши эмланган зиёратчиларга ҳаж учун рухсат беришини маълум қилган эди.
Изоҳ (0)