Ўзбекистондан Россияга учувчи мунтазам авиарейслар ҳозирча қайта йўлга қўйилмади
Март охирларида Россия 1 апрелдан Ўзбекистон билан мунтазам авиақатновларни тиклаши тўғрисида хабар берилганди. Россиянинг Ўзбекистондаги элчихонаси Консуллик бўлимининг маълум қилишича, биринчи босқичда фақат битта йўналиш амалга оширилади — ҳафтасига бир марта Москва—Тошкент.
Таъкидланишича, барча ўзбекистонликлар фақат мазкур рейсдан фойдаланиши мумкин.
Ҳозирда амалга оширилаётган бошқа рейслар чартер ҳисобланади — Россия ҳудудига кириш учун бирор асос кўрсатилиши мажбурий этиб белгиланган (масалан, ўқиш).
Spot’нинг қайд этишича, 5 апрель ҳолатига кўра, Ўзбекистон ва Россия авиация масъуллари ташувчилар ҳақида келишиб олмаган, шу сабабли ҳозирча мунтазам рейслар йўқ.
Масалан, Тожикистон ва Россия авиация раҳбарияти бу борада ўзаро келишиб олган ва 4 апрелда Somon Air авиакомпанияси Душанбе—Москва йўналиши бўйича биринчи парвозни амалга оширди. Россия томонидан UTair парвоз қилади.
Эслатиб ўтамиз, 2021 йилнинг 20 мартида 25 та мамлакатдан келадиган талабаларнинг Россияга киришига рухсат берилди, бироқ улар орасида Ўзбекистон ўрин олмади. Ўзбекистоннинг Россиядаги элчихонаси матбуот хизмати талабалари Россияга киришга рухсат этилувчи давлатларнинг рўйхати «Роспотребнадзор» томонидан мунтазам равишда янгиланиб туришини маълум қилганди. 4 апрель куни эса ўзбекистонлик талабаларга Россияга киришга рухсат берилгани эълон қилинди.
