АҚШ Қуролли кучлари Марказий қўмондонлиги стратегия, режалаштириш ва сиёсат бошқармаси бошлиғининг ўринбосари, бригада генерали Дюк Пирак бошчилигидаги делегация Ўзбекистонга ташриф буюрди, деб хабар беради Мудофаа вазирлиги матбуот хизмати.
Маълум қилинишича, ташриф доирасида бригада генерали Дюк Пирак Ўзбекистон мудофаа вазирининг биринчи ўринбосари – Қуролли Кучлар Бош штаби бошлиғи генерал майор Шуҳрат Холмуҳамедов билан учрашган.
Учрашувда икки давлат ўртасида хавфсизлик соҳаси ва ҳарбий ҳамкорликнинг ҳолати, унинг истиқболлари муҳокама этилган.
«Ташрифнинг кейинги кунларида делегация аъзоларини Самарқанд шаҳрида жойлашган кичик мутахассисларни тайёрлаш маркази фаолияти билан яқиндан таништириш, тарихий шаҳарнинг диққатга сазовор жойларига саёҳат режалаштирилган», — дейилади хабарда.
Аввалроқ Шуҳрат Холмуҳамедовга Президент фармони билан генерал майор унвони берилгани ва у мудофаа вазирининг биринчи ўринбосари этиб тайинлангани маълум қилинганди.
Изоҳ (0)