Эронда бир кунда 14 мингга яқин одам коронавирусга чалинди. Бу охирги тўрт ой ичидаги кунлик антирекорд

Эронда 5 апрель куни коронавирус билан касалланиш бўйича 13 890 та янги ҳолат рўйхатга олинди. Бу охирги тўрт ойда бир кун давомида қайд этилган энг юқори кўрсаткич. Бу ҳақда IRNA агентлигига таяниб «Интерфакс» хабар берди.

Коронавирус қурбонлари сони 172 тага кўпайди. Икки минг нафардан ортиқ аҳоли шифохонага ётқизилди.

Шу кунларда мамлакатда коронавируснинг тарқалиш сурати ортмоқда. Касалланиш ҳолатлари асосан Теҳронда аниқланяпти, у ерда фақат энг муҳим хизматлар фаолияти тўхтатилмаган.

AstraZeneca компаниясининг биринчи 700 минг доза вакцинаси COVAX дастурининг ташаббуси доирасида Амстердамдан Теҳронга юборилди. Шунингдек, 9 февралдан бошлаб мамлакатда Россиянинг «Спутник V» вакцинаси билан эмлаш олиб борилмоқда. Мамлакатда энг камида 250 минг киши вакцинанинг биринчи дозасини олиб улгурди.

Пандемия бошидан буён Эронда жами 1,9 миллион аҳоли коронавирус билан касалланди, уларнинг 63 мингдан ортиғи вирус қурбонига айланди.

Аввалроқ Чехияда қарийб икки ой ичида илк маротаба коронавирусга чалиниш ҳолатининг кунлик ўсиши 15 000 дан ошгани ҳақида хабар берилди. 10,7 миллион аҳоли истиқомат қиладиган мазкур мамлакатда 23 февраль, ўтган бир кеча-кундузда инфекция юқтириш бўйича 15 672 та янги ҳолат тасдиқланди. Охирги марта бундай юқори кўрсаткич 6 январь куни қайд этилган. Январь ойининг ўрталаридан февраль ойининг иккинчи ярмига қадар касалланишнинг кунлик ўсиши 10 мингдан кам бўлган.

Венгрия Соғлиқни сақлаш хизмати эса бир кун давомида коронавирусдан вафот этган 195 нафар бемор ҳақида хабар берди. Бу кўрсаткич мамлакат учун пандемия бошидан бери антирекорд ҳисобланади.