Eronda 5-aprel kuni koronavirus bilan kasallanish bo‘yicha 13 890 ta yangi holat ro‘yxatga olindi. Bu oxirgi to‘rt oyda bir kun davomida qayd etilgan eng yuqori ko‘rsatkich. Bu haqda IRNA agentligiga tayanib “Interfaks” xabar berdi.
Koronavirus qurbonlari soni 172 taga ko‘paydi. Ikki ming nafardan ortiq aholi shifoxonaga yotqizildi.
Shu kunlarda mamlakatda koronavirusning tarqalish surati ortmoqda. Kasallanish holatlari asosan Tehronda aniqlanyapti, u yerda faqat eng muhim xizmatlar faoliyati to‘xtatilmagan.
AstraZeneca kompaniyasining birinchi 700 ming doza vaksinasi COVAX dasturining tashabbusi doirasida Amsterdamdan Tehronga yuborildi. Shuningdek, 9-fevraldan boshlab mamlakatda Rossiyaning “Sputnik V” vaksinasi bilan emlash olib borilmoqda. Mamlakatda eng kamida 250 ming kishi vaksinaning birinchi dozasini olib ulgurdi.
Pandemiya boshidan buyon Eronda jami 1,9 million aholi koronavirus bilan kasallandi, ularning 63 mingdan ortig‘i virus qurboniga aylandi.
Avvalroq Chexiyada qariyb ikki oy ichida ilk marotaba koronavirusga chalinish holatining kunlik o‘sishi 15 000 dan oshgani haqida xabar berildi. 10,7 million aholi istiqomat qiladigan mazkur mamlakatda 23-fevral, o‘tgan bir kecha-kunduzda infeksiya yuqtirish bo‘yicha 15 672 ta yangi holat tasdiqlandi. Oxirgi marta bunday yuqori ko‘rsatkich 6-yanvar kuni qayd etilgan. Yanvar oyining o‘rtalaridan fevral oyining ikkinchi yarmiga qadar kasallanishning kunlik o‘sishi 10 mingdan kam bo‘lgan.
Vengriya Sog‘liqni saqlash xizmati esa bir kun davomida koronavirusdan vafot etgan 195 nafar bemor haqida xabar berdi. Bu ko‘rsatkich mamlakat uchun pandemiya boshidan beri antirekord hisoblanadi.
Izoh (0)