Тошкент вилояти Қуйи Чирчиқ туманида маст ҳолда жанжаллашиб, танишига тан жароҳати етказган шахс қўлга олинди, дея хабар бермоқда Тергов департаменти.
Маълум қилинишича, 2021 йилнинг 20 март куни соат 21:30 ларда 26 ёшли М.Б. маст ҳолатда Қуйи Чирчиқ тумани «Кўксарой» МФЙ ҳудудида 36 ёшли Б.Р. билан ўзаро жанжаллашиб, бильярд таёғи билан унинг бош қисмига уриб жароҳат етказган.
Оқибатда Б.Р. бош мия очиқ жароҳати, бош мия лат ейиши каби жароҳатлар билан шифохонага ётқизилган.
Суд тиббий экспертиза хулосасида Б.Р. оғир турдаги тан жароҳатлари олганлиги кўрсатилган.
Олиб борилган терговга қадар текширув ҳаракатлари давомида М.Б. ва Б.Р. ҳеч бир сабабсиз жанжаллашиб қолгани, уларнинг иккаласи ҳам маст ҳолатда бўлгани аниқланган.
Мазкур ҳолат юзасидан Қуйи Чирчиқ тумани ИИБ ҳузуридаги тергов бўлими томонидан М.Б.га нисбатан Жиноят кодексининг 104-моддаси 2-қисми «э, л» бандлари (безорилик оқибатида совуқ қурол сифатида фойдаланилиши мумкин бўлган ашёларни ишлатиб қасддан баданга оғир шикаст етказиш) билан жиноят иш қўзғатилиб, процессуал тартибда ушланган.
Ҳозирда тергов ҳаракатлари олиб борилмоқда.
Аввалроқ Навоийда чиқинди йиғиш билан шуғулланувчи фуқаро шериги томонидан дўппослаб ўлдирилгани, Термизда эр қизини кўришга тўсқинлик қилгани учун хотинига пичоқ ургани ҳамда Самарқандда қизининг шаънини булғовчи гап-сўзларни тарқатган эркакни калтаклаган отага нисбатан жиноят иши қўзғатилгани ҳақида хабар берилганди.
Изоҳ (0)