Юқори тана ҳарорати ёқимсиз бўлса-да, фойдали ҳамдир. Айнан иситма туфайли тана вирус ва бактерияга қарши курашишга уринади.
Аммо баъзи ҳолларда юқори тана ҳарорати шифокорга мурожаат қилишнинг вақти келганидан дарак беради. Албатта, буни эътиборсиз қолдириш мумкин эмас.
Узоқ муддатли юқори ҳарорат
Агар тана ҳарорати уч кун давомида 38 даражадан ошган бўлса, дарҳол шифокорга мурожаат қилиш керак. Эҳтимол, бу танада инфекция пайдо бўлгани ва бунинг учун антибиотиклар кераклигидан дарак бўлиши мумкин.
Қориннинг пастки ўнг қисмида оғриқ
Ушбу соҳадаги оғриқ шифокор кўриги учун мажбурий сабабдир. Мутахассислар ҳеч қандай ҳолатда оғриқ қолдирувчи воситалар билан ҳолатни тўхтатишни маслаҳат бермайди. Аммо оғриқ билан биргаликда иситма кузатилса, шошилинч тез ёрдам чақириш керак. Балки бу кўричак бўлиши ҳам мумкин.
Белда оғриқ ва қон аралаш пешоб
Пешоб вақтида тос ва белда оғриқ ҳамда қон, шунингдек, иситма бўлса, дарҳол тиббий кўрикдан ўтиш зарур. Ушбу аломатлар пешоб чиқариш тизимида ривожланаётган инфекциядан огоҳлантириши ва жиддий чоралар талаб қилиши мумкин.
Томоқ оғриғи
Эндиликда томоқ оғриғини дори воситалари ёрдамида даволаш мумкин. Аммо юз йил аввал одамлар айнан ушбу касалликдан ҳам вафот этган. Шунинг учун ҳам томоқ оғриғида кузатиладиган юқори тана ҳарорати, шунингдек, кўнгил айниши ва бош оғриғини жиддий қабул қилиш керак.
Ошқозон бузилиши
Бу овқатдан заҳарланиш, Крон касаллиги, ошқозон яраси каби касалликлар аломати бўлиши мумкин. Ушбу касалликнинг барчаси диарея ва сувсизланишни келтириб чиқаради, натижада тана ҳарорати ортади. Шунинг учун ҳам шифокорга бориш ва овқат ҳазм қилиш тизимини текширтириш зарур.
Тромб
Тананинг юқори ҳарорати қонда тромб пайдо бўлишига ҳам олиб келиши мумкин. Шунингдек, иситма юракнинг тез уриши ва нафас қисилиши билан кечадиган бўлса, жуда хавфлидир. Аммо ушбу аломатлар бўлмаса ҳам, оёқларда шиш пайдо бўлганини текшириб кўриш лозим.
Бўғимларда оғриқ
Сабабсиз иситма артрит туфайли келиб чиқиши ҳам мумкин, айниқса, ревматоидда. Ушбу касалликни келтириб чиқарадиган яллиғланиш жараёни иситма кўтарилишига сабаб бўлади. Шунингдек, эрта тонгда танада кучли оғриқ юз беради.
Нафас қисилиши ва чарчоқ
Нафас етишмовчилиги, оғир чарчоқ юқори иситма билан бирга кузатилса, зудлик билан шифокорга мурожаат қилиш зарур. Эҳтимол, бу пневмония белгилари бўлиши мумкин. Пневмонияда кислород қонга оз миқдорда етиб боради ва юрак билан мия доимгидек ишлашда қийинчиликка учрайди. Агар ушбу аломатларга қўшимча равишда йўтал ва кўкрак соҳасида оғриқ пайдо бўлса, дарҳол шифокор билан маслаҳатлашиш зарур.
Мавзуга доир:
Изоҳ (0)