Йилнинг биринчи чорагида олтин нархи, тахминан, 10 фоизга арзонлаб, ушбу давр учун 1982 йилдан буён рекорд пасайиш бўлди, деб ёзмоқда Spot Bloomberg’га таяниб.
Қайд этилишича, 2020 йил августидан буён олтин 19 фоизга арзонлади ва пандемиядан олдинги нархига тенглашди.
Олтин ҳимоя активи ҳисобланади — инқироз даврида кўтарилади, вазият яхшилигида эса аксинча, унинг нархи пасаяди. Пандемия давом этаётган бўлса-да, вакциналар ишлаб чиқариш бўйича натижалар яқин орада коронавируснинг иқисодиётга таъсири йўқолишига умид бермоқда.
Олтин нархига, шунингдек, бошқа бир қатор омиллар, масалан, АҚШ ғазначилик облигациялари билан боғлиқ вазият (ушбу чорак улар учун бир неча ўн йилдан буён энг ёмони бўлди) ва криптовалюталар билан рақобат таъсир ўтказади.
Олтин ва Ўзбекистон
2020 йилда Ўзбекистонда хорижга 100 тонна номонетар олтин сотган. Бу тонналарда амалга оширилаётган сотувларга оид маълумотларнинг сўнгги 10 йил ичида биринчи маротаба эълон қилиниши. Давлат статистика қўмитаси олтинга оид статистикани мунтазам эълон қилиб келади, бироқ у миқдор эмас, балки пул кўринишида.
Ўзбекистон Марказий банки ҳисоботидан маълум бўлишича, энг кам олтин сотилган давр 2012 йил (10 тонна) бўлиб, энг кўп сотилган йил 2019 йил (110 тонна) бўлди. Ушбу даврлардаги ўртача нархлар ҳам турлича бўлган, масалан, 2012 йилда олтиннинг бир унцияси нархи 1668,9 доллар бўлган. 2015 йилда эса 1159,8 долларгача тушган. 2020 йилда 1771 долларга ўсди.
Ўзбекистон сўнгги марта 2020 йил августида олтин экспорт қилди. Марказий банк олтинни валюта активларини самарали бошқариш, шу жумладан, халқаро қимматбаҳо металлар бозори таҳлили ва олтин нархлари прогнози асосида сотади.
Марказий банк олтин нархи қиммат бўлган (2 минг долларгача кўтарилган) пайтда фаол равишда сотган. Сентябрь ойида, экспорт тўхтаган пайтда олтин нархи 1904 долларга тушди. Ҳозирда эса унинг нархи 1724 долларгача арзонлади.
Изоҳ (0)