Ўзбекистондаги 14 та вилоят ҳамда 203 та туман (шаҳар)ларнинг 2020 йил якунлари бўйича бизнес рейтинги эълон қилинди. Бу ҳақда Адлия вазирлиги матбуот хизмати хабар берди.
Қайд этилишича, рейтинг бўш турган бино-иншоотлар ва участкаларни тадбиркорлик фаолияти учун ажратилганлик ҳолати, эркин иқтисодий ва кичик саноат зоналаридан самарали фойдаланиш даражаси, тадбиркорлик субъектларининг мулк ҳуқуқи дахлсизлигининг таъминланганлик кўрсаткичи, тадбиркорлик субъектларига кредитлар ажратилиши ҳолати каби жами 30 та индикатор бўйича шакллантирилди. Уни шакллантиришда 15 та ваколатли органлар томонидан киритилган 4 мингга яқин статистик маълумотлар ҳамда 25 мингдан ортиқ тадбиркордан сўров йўли билан олинган 475 мингга яқин ахборот таҳлил қилинган.
Ҳукуматнинг «Республика ҳудудларида тадбиркорликнинг ривожланганлик даражасига баҳо бериш тизимини жорий этиш чора-тадбирлари тўғрисида»ги қарори билан жойларда тадбиркорликнинг ривожланганлик даражасини аниқлаш вазифаси Иқтисодий тараққиёт ва камбағалликни қисқартириш вазирлиги ҳамда Адлия вазирлигига юклатилган.
Баҳолаш тегишли низом асосида ярим йиллик ва йил якуни бўйича амалга оширилади. Унинг якунлари бўйича тадбиркорликнинг ривожланганлик даражаси «намунали» деб топилган ҳудудларнинг ижобий иш тажрибаси бошқа ҳудудлар ўртасида оммалаштириш бўйича тегишли чора-тадбирлар кўрилади.
Баҳолаш натижаларига кўра, 2020 йил якунлари бўйича Тошкент шаҳри 1-ўринни эгаллади. Ундан кейинги ўринлардан Наманган, Навоий ва Бухоро вилоятлари жой олди. Сурхондарё вилояти охирги ўринни эгаллади. Туман (шаҳар)лар ичида Бектемир тумани 1-ўринни, Бахмал тумани охирги ўринни эгаллади.
Маълумот учун, ҳудудларнинг бизнес рейтинги b-indicator.uz сайтида эълон қилиниб келинади. Ушбу сайтда ҳудудларнинг бизнес рейтинги билан батафсил танишиш мумкин.
Изоҳ (0)