O‘zbekistondagi 14 ta viloyat hamda 203 ta tuman (shahar)larning 2020-yil yakunlari bo‘yicha biznes reytingi e’lon qilindi. Bu haqda Adliya vazirligi matbuot xizmati xabar berdi.
Qayd etilishicha, reyting bo‘sh turgan bino-inshootlar va uchastkalarni tadbirkorlik faoliyati uchun ajratilganlik holati, erkin iqtisodiy va kichik sanoat zonalaridan samarali foydalanish darajasi, tadbirkorlik subyektlarining mulk huquqi daxlsizligining ta’minlanganlik ko‘rsatkichi, tadbirkorlik subyektlariga kreditlar ajratilishi holati kabi jami 30 ta indikator bo‘yicha shakllantirildi. Uni shakllantirishda 15 ta vakolatli organlar tomonidan kiritilgan 4 mingga yaqin statistik ma’lumotlar hamda 25 mingdan ortiq tadbirkordan so‘rov yo‘li bilan olingan 475 mingga yaqin axborot tahlil qilingan.
Hukumatning “Respublika hududlarida tadbirkorlikning rivojlanganlik darajasiga baho berish tizimini joriy etish chora-tadbirlari to‘g‘risida”gi qarori bilan joylarda tadbirkorlikning rivojlanganlik darajasini aniqlash vazifasi Iqtisodiy taraqqiyot va kambag‘allikni qisqartirish vazirligi hamda Adliya vazirligiga yuklatilgan.
Baholash tegishli nizom asosida yarim yillik va yil yakuni bo‘yicha amalga oshiriladi. Uning yakunlari bo‘yicha tadbirkorlikning rivojlanganlik darajasi “namunali” deb topilgan hududlarning ijobiy ish tajribasi boshqa hududlar o‘rtasida ommalashtirish bo‘yicha tegishli chora-tadbirlar ko‘riladi.
Baholash natijalariga ko‘ra, 2020-yil yakunlari bo‘yicha Toshkent shahri 1-o‘rinni egalladi. Undan keyingi o‘rinlardan Namangan, Navoiy va Buxoro viloyatlari joy oldi. Surxondaryo viloyati oxirgi o‘rinni egalladi. Tuman (shahar)lar ichida Bektemir tumani 1-o‘rinni, Baxmal tumani oxirgi o‘rinni egalladi.
Ma’lumot uchun, hududlarning biznes reytingi b-indicator.uz saytida e’lon qilinib kelinadi. Ushbu saytda hududlarning biznes reytingi bilan batafsil tanishish mumkin.
Izoh (0)