АҚШ мутахассислари Шимолий Кореянинг Йонбён ҳудудидаги ядровий объектларда фаолликни рўйхатга олди ва мамлакат плутонийни қайта ишлаш ёки шунга тайёргарлик кўришда гумон қилди. Бу ҳақда Вашингтоннинг Стратегик ва халқаро тадқиқотлар маркази сайтида эълон қилинган ҳисоботда маълумот берилди.
Спутник маълумотларига кўра, бир ҳафтадан буён объектларнинг энг камида биттаси доимий равишда иситилмоқда — бу ҳолат объектдан кўтарилган буғ ёки тутун сабабли аниқланди. Ушбу фаоллик КХДРнинг плутонийни қайта ишлаш бўйича янги кампанияни бошлагани ёки унга тайёрланаётганини англатади. Шунингдек, сўнгги пайтларда иншоот билан боғлиқ бўлган электр станциясининг фаоллиги ҳақида ҳам маълумотлар берилган.
АҚШ ҳукумати Пхеньяннинг бу ҳаракатларини Сеул ва Вашингтон билан қарама-қаршиликни кучайтириш учун ўйлаган стратегиясининг бир қисми, деб ҳисобламоқда.
25 март куни Шимолий Корея иккита баллистик ракетани ишга туширди. Япония бош вазири Ёсихидэ Суга ушбу ҳодисани БМТ Хавфсизлик кенгаши резолюциясининг бузилиши ва минтақанинг тинчлиги ва хавфсизлигига таҳдид деб атади.
Эслатиб ўтамиз, 25 март куни Шимолий Корея иккита тактик ракетанинг муваффақиятли синовлари ҳақида маълум қилган. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб тегган.
КХДР Япон денгизига қарата иккита баллистик ракетани учирди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилган. Бунгача эса АҚШ ҳарбийлари Пхеньян тез орада баллистик ракеталар учиришни қайта бошлаши ҳақида огоҳлантирган эди.
Кейинроқ Шимолий Корея томонидан баллистик ракеталарнинг учирилиши АҚШ ва Япониянинг доимий таҳдидлари олдида ўзини ҳимоя қилиш бўлгани ҳақида айтилди.
«Яқинда амалга оширилган янги бошқарилувчи тактик ракеталарнинг синовдан ўтказилиши суверен давлатнинг ўзини ўзи ҳимоя қилиш бўйича умумбашарий ҳуқуқидан фойдаланишга тенг ҳаракат бўлди», — деди қўмита котиби.
Изоҳ (0)