Сергели тумани ҳокими Элбек Шукуров YouTube’даги Alter Ego лойиҳасига берган интервьюсида амалдаги лавозимига қандай тайинлангани ҳақида гапириб берди. Унинг сўзларига кўра, ҳаммаси коронавирус пандемияси айни авжига чиққан вақтда, у ҳали жисмоний тарбия ва спорт вазири ўринбосари сифатида ишлаётганида бошланган.
«Мен шаҳар ҳокимининг олдига келиб, ‘Қандай ёрдам бера оламан?’, деб сўрадим, чунки тиббиёт учун масъул йўналишни бошқараётгандим. Ўшанда у ‘Ўзэкспомарказ’ билан шуғулланишни сўради («Ўзэкспомарказ»да коронавирусга чалинган беморлар учун тақсимот маркази ташкил этилган эди, у бир неча ой ишлади — «Дарё»). Биз ҳоким билан биргаликда ишни ташкил қилдик. Мен доимий ўша ерда бўлдим, яшадим. Бу, адашмасам, июль ойида эди», — деди ҳоким.
Тахминан шу вақтда Сергели тумани раҳбари лавозимидан озод қилинган. «Бир куни тушлик вақтида Жаҳонгир Ортиқхўжаев: ‘Мана, сен спортга кетиб қолдинг, ваҳоланки, яхши ишлаётгандик’, деб қолди». Элбек Шукуров бунга жавобан «қалбан ҳар доим ҳокимликда экани ва келажакда у ерга қайтиш нияти бор»лигини айтган.
«Орадан икки-уч ҳафта ўтиб, у менга: ‘Сен қалбан ҳокимликда эдинг-ку, мен сени Сергели тумани ҳокими лавозимига тавсия қилдим. Нима дейсан шунга?’, деди. Мен: ‘Сиз билан ишлашга жон деб бораман’, деб жавоб бердим», — деб хотирлади Элбек Шукуров.
Интервью давомида Элбек Шукуров ҳокимларни сайлаш масаласига қандай муносабатда эканини ҳам билдириб ўтди. Унинг таъкидлашича, «биз яқин вақт ичида бу жараёнга етиб келамиз».
«Ҳокимларни тўғридан-тўғри сайлаш масаласига келсак, президент яқинда бу масалага тўхталиб, биз ҳали тайёр эмаслигимизни таъкидлади. Бироқ, ишончим комил, биз албатта бу жараёнга етиб келамиз. Асосийси, сайловлар вақтидаги тўғри шаффоф тизимни таъминлаш керак», — деди Сергели тумани ҳокими.
Эслатиб ўтамиз, Тошкент шаҳар ҳокимининг собиқ ўринбосари ҳамда жисмоний тарбия ва спорт вазирининг собиқ ўринбосари Элбек Шукуров 2020 йилнинг август ойида Сергели тумани ҳокими этиб тайинланган эди.
Изоҳ (0)