Ўзбекистонда нодавлат тиббиёт муассасаларига ҳам коронавирус инфекциясига қарши пулли эмлашни амалга оширишига рухсат берилади. Бу ҳақда Коронавирусга қарши курашиш штаби аъзоси Нурмат Отабеков «Ўзбекистон 24»га берган интервьюсида маълум қилди.
Фото: Инновацион ривожланиш вазирлиги матбуот хизмати
«Касаллик хавфли бўлганлар рўйхатига киритилмаган кишилар учун пуллик эмлаш режали эмлаш мажбурияти бўлмаган нодавлат эмлаш пунктлари ва тиббиёт муассасалари томонидан амалга оширилади. Табиийки, ҳар бир ҳолатда санитария-эпидемиология таъминоти хизматининг ҳудудий марказлари томонидан ташкилотларнинг вакцинасия қилиш талабларига қай даражада жавоб беришини инобатга олган ҳолда махсус рухсатнома берилади», — деган Нурмат Отабеков.
Нурмат Отабеков биринчи навбатда коронавирусга чалинган беморларни даволашга ихтисослашган муассасалар, тез тиббий ёрдам, шошилинч тиббий ёрдам тизими, юқумли касалликлар шифохонаси, коронавирусга лаборатория ташхиси билан шуғулланадиган ходимлар ва амбулатория, поликлиника хизмати ходимлари эмланишини эслатиб ўтган.
Ўзбекистонда аҳолини коронавирусга қарши эмлаш тадбирлари 2021 йил 1 апрелдан бошланади. Эмлаш тадбирлари апрель ойида вилоятлар марказлари ва катта шаҳарларда бошланади, май ойида туман марказлари ва кичик шаҳарларда амалга оширилади, июнь ойида эса бошқа аҳоли қатлами эмланади.
Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси Ўзбекистон–Хитой ҳамкорлигида ишлаб чиқилган ZF-UZ-VAC 2001 вакцинаси.
Аҳолини ушбу вакциналар билан эмлаш бир пайтнинг ўзида амалга оширилади. Бунда эмланувчи биринчи эмланишни қайси вакцина билан бошласа, иккинчисини ҳам айнан ўша вакцина билан якунлайди. AstraZeneca вакцинаси билан 2 маротаба, ZF-UZ-VAC2001 вакцинаси билан 3 маротаба эмлаш кўзда тутилмоқда. Яъни, вакцинация икки хил вакцинада икки хил амалга оширилади.
Нурмат Отабековнинг ўзи исталган вакцина билан жон деб эмланишини маълум қилган.
