Toshkentda qurilish kompaniyasi tomonidan o‘z uyidan majburan chiqarib yuborilgan Mavjuda Mamatqosimova ismli ayol vafot etdi, deb xabar beradi “Podrobno”.
Ma’lumotlarga ko‘ra, Mavjuda Mamatqosimova poytaxtning Oltintepa ko‘chasidagi (sobiq Sialkovskiy ko‘chasi) uyida oilasi bilan yashab kelgan. 2019-yilda BB-stroy kompaniyasi mavjud ikki qavatli uyni buzib, uning o‘rnida ko‘p qavatli turar joy binosini qurish bo‘yicha Toshkent hokimi Jahongir Ortiqxo‘jayevning ruxsatini olgan. Shunda Mavjuda Mamatqosimova taklif etilayotgan kompensatsiyaga rozi bo‘lmagan, biroq qurilish kompaniyasi fuqarolik ishlari bo‘yicha Mirzo Ulug‘bek sudidan oilani majburan ko‘chirish borasidagi qarorni olishga erishgan.
Ta’kidlanishicha, ikki yil davom etgan ruhiy stress oqibatida ayol komaga tushgan va 28-mart kuni vafot etgan.
“Men nima qilishni bilmayapman. Farzandlarimni bir o‘zim katta qilganman, davlatdan hech qanday yordam olgan emasman. Faqat o‘zimga ishonib, hech kimdan biror narsa so‘ramaganman. Hech kim tilanchilik qilmayapti, yugurmayapti. Qanday qilib mening xususiy mulkimni olib qo‘yish mumkin? Kvartiramni 2004-yilda shaxsiy pullarimga sotib olganman”, — degan edi Mamatqosimova yaqinda bergan intervyusida.
Mavzuga doir:
Izoh (0)