Myanmada hukumatni boshqarayotgan harbiylar mamlakatda saylovlar qaytadan o‘tkazilganidan keyin boshqaruvni yangi saylangan vakillarga topshirishni va’da qildi. Bu haqda Myanma Qurolli Kuchlari tashkil etilgan kun munosabati bilan o‘tkazilgan tadbirda mamlakat harbiy kuchlari bosh qo‘mondoni, katta general Min Aun Xlayn ma’lum qilgan, deb yozmoqda “TASS”.
“Biz hukumat boshqaruvini erkin va halol saylovlar o‘tkazilganidan keyin topshiramiz”, — degan general Min Aun Xlayn.
U Myanmada 2020-yilda o‘tkazilgan saylovlarning natijalari qalbakilashtirilganidan keyin harbiy davlat to‘ntarishining yuz berishi tabiiy holat ekanligini ta’kidlagan.
Myanma harbiylari 1-fevral kuni mamlakatda favqulodda holat e’lon qildi va davlat boshqaruvi shakli aralash hukumatga o‘zgardi. Armiya vakillari 2020-yil noyabr oyida bo‘lib o‘tgan saylovlardagi ovozlar qalbakilashtirilganini bildirgan va Vazirlar Mahkamasining yangi tarkibini shakllantirgan. Respublika fuqarolari fevraldan harbiylarning mazkur harakatlariga qarshi norozilik namoyishi o‘tkazishni boshlagan, mamlakatda kuchishlatar tizim hamda fuqarolar o‘rtasida keskin to‘qnashuvlar sodir bo‘lmoqda. 25-mart kuni Myanmada harbiylarning hukumat boshqaruviga qarshi harakati va demokratiya tarafdori bo‘lgan faollarning navbatdagi namoyishlari qayta boshlangan. Ma’lumotlarga ko‘ra, 1-fevraldan beri harbiylar hamda fuqarolar o‘rtasida kuzatilgan to‘qnashuvlarda 300 nafardan ziyod odam halok bo‘lgan.
BMT bosh kotibi Antoniu Guterrish harbiylar harakatlarini “Myanmada amalga oshirilgan demokratik islohotlarga jiddiy zarar yetkazish” deya qoralagan. Yevropa Ittifoqi Myanmadagi vaziyat yuzasidan 11 kishiga qarshi sanksiya e’lon qilgan.
Myanmada hokimiyat tepasiga kelgan harbiylar mamlakatning sobiq yetakchisi, davlat maslahatchisi Aun San Su Chji noqonuniy ravishda 600 ming AQSh dollari va undan biroz ko‘proq bo‘lgan mablag‘ga teng oltinlarni o‘zlashtirganlikda ayblamoqda.
Izoh (0)