Sauterur d’Alfort турига кирувчи қуёнлар сакрай олмайди — шу сабабли олд панжаларида юради. Олимлар бунинг сабабини аниқлади

Meduza олд панжаларига таянган ҳолда орқа оёқларини кўтариб ҳаракатланаётган қуён видеоси билан бўлишди.

Маълум қилинишича, жуда ноёб ҳисобланувчи sauterur d’Alfort турига кирадиган қуённинг RORB генида патологик ўзгаришлар мавжуд бўлиб, у орқа миянинг нерв ҳужайраларида муҳим вазифани бажаради (айнан қайси вазифани бажариши ҳозиргача номаълум). Шу сабабли sauterur d’Alfort қуёнлари сакрай олмайди.

Уларнинг мияси сакраш учун орқа панжалар ҳаракатини мувофиқлаштира олмайди. Шу билан бирга, олд панжалар яхши ишлайди. Шундай экан, sauterur d’Alfort қуёнларига орқа панжаларида сакрагандан кўра, олд панжаларида юриш осон.

RORB гени ҳақида Португалия ва Швеция олимларининг ҳамкорликда олиб борган тадқиқотлари давомида маълум бўлган. Улар sauterur d’Alfort туридаги қуёнларни оддий қуёнлар билан чатиштирган ва уларнинг 52 та авлодидаги геномларни ўрганган. Сакрашни билмайдиган қуёнларнинг RORB генида мутация аниқланган.

Аввалроқ олимлар қуёнларнинг гўштхўр тури борлигини аниқлаган эди.