Тошкентда Yandex Go томонидан кўрсатилган такси хизмати учун тўловни банк картасидан амалга ошириш имкониятини ишга туширган эди. Нақдсиз тўлов тури танланганда пул автоматик равишда картадан ечиб олинади.
Бироқ Spot’нинг ёзишича, сервиснинг бир неча фойдаланувчилари ҳамма ҳайдовчилар ҳам тўловни картадан қабул қилмаётганидан шикоят қилган. Ижтимоий тармоқларда ҳам шу ҳақдаги постлар пайдо бўлди. Фойдаланувчилар ҳайдовчилар буюртмаларни қабул қилаётгани, аммо тўловни фақат нақд кўринишда олишга рози бўлаётганини ёзиб қолдирган.
Бир неча ҳайдовчилар ўз хатти-ҳаракатларини пластик карталардан фойдаланмасликлари ва нақдсиз тўлов билан ишлаш уларга ноқулай эканлиги билан изоҳлаган.
«Ҳайдовчилар белгиланган буюртмадан бош тортмаслиги лозим. Агар шундай вазият юзага келган бўлса, фойдаланувчиларга Yandex Go иловаси орқали қўллаб-қувватлаш хизматига мурожаат қилишини тавсия этамиз. Агар шикоятлар такрорланса, ҳайдовчи сервис буюртмаларини бажаришдан четлатилади» — деган Yandex Go матбуот хизмати Spot’га.
Шунингдек, барча ҳамкор таксопарклар ва уларнинг ҳайдовчилари карта орқали тўловлар амалга оширилиши тўғрисида аввалдан бир неча бор огоҳлантирилгани ҳамда янги тўлов усули бўйича малака ошириш курсларидан ўтгани таъкидланган.
Бундан ташқари, айрим ҳолларда иловада буюртма беришда карта орқали тўлов қилишда муаммолар кузатилмоқда: сервис картада пул бўлса ҳам, уни ечиб олишнинг имкони бўлмаганини билдирмоқда. Компания ушбу муаммони ҳам бартараф этишга ваъда берган.
Эслатиб ўтамиз, «Яндекс.Такси» иловаси 2020 йилнинг август ойидан Yandex Go номи остида фаолият кўрсатишни бошлади. Ўзбекистонда ҳозирча унинг фақатгина такси ва етказиб бериш хизматидан фойдаланиш мумкин. Тошкентда ушбу хизмат 2018 йилнинг апрелида ишга тушган бўлиб, ҳозирда ундан Фарғона, Марғилон ва Наманганда ҳам фойдаланиш мумкин.
Изоҳ (0)