Ўзбекистонда полиомиелитни назорат қилиш кучайтирилди

Ўзбекистонда полиомиелит ва ўткир шол фалажининг (ЎШФ) фаол эпидемиологик назоратини кучайтириш мақсадида чора-тадбирлар амалга оширилмоқда. Бу ҳақда Санитария-эпидемиологик осойишталик ва жамоат саломатлиги хизмати хабарига таяниб, «Gazeta.uz» маълум қилди.

Хабарда айтилишича, Ўзбекистонда полиомиелит касаллиги учрамайди, аммо унинг чет давлатлардан кириб келган шахслар орқали мамлакатга кириб келиш эҳтимоли мавжуд. Куни кеча ЖССТ қўшни Тожикистонда полиомиелит эпидемияси бошлангани ҳақида маълум қилди. Вазият иккинчи даражали фавқулодда ҳолат деб таснифланган. Полиомиелит, шунингдек, Афғонистонда ҳам қайд этилмоқда.

Ўткир шол фалажни назорат қилиш бўйича эпидемиологик вазиятни ўрганиш учун Санитария хизмати мутахассислари Тожикистон ва Афғонистон билан чегарадош бўлган Сурхондарё вилоятига борди. Улар давлат чегарасининг санитария назорати пунктларида ва даволаш-профилактика муассасаларида ЎШФнинг  фаол эпидемиологик кузатувини кучайтиришни ташкил этиш бўйича амалий ва маслаҳат ёрдами кўрсатди.

Вилоятида ёввойи полиовируснинг иккинчи тури тарқалишининг олдини олиш мақсадида 10—20 март кунлари 5 ёшгача бўлган болалар ўртасида оммавий эмлаш ўтказилган.

Полиомиелит нима?

ЖССТ маълумотларига кўра, полиомиелит вируслар келтириб чақирадиган юқори инфекцияли касаллик. Касаллик асаб тизимини шикастлайди бир неча соатларда умумий фалажликка олиб келиши мумкин. Полиомиелит билан асосан 5 ёшгача бўлган болалар касалланади.

Вирус ифлосланган озиқ-овқат маҳсулотлари ва сув орқали ўтади, ичакда кўпаяди ва у ердан асаб тизимига ўтиши мумкин. Инфекцияланган кишиларнинг аксариятида касаллик аломатлари бўлмайди, лекин вирус уларда ахлат орқали чиқиб кетади ва шу орқали у бошқа одамларга юқиши мумкин.

Инфекцияга чалинишнинг ҳар 200 та ҳолатидан бирида умрбод фалажлик (асосан оёқлорда) юзага келади. Иситма, толиқиш, бош оғриғи, қайд қилиш, оёқ-қўллардаги оғриқлар, бўйин қотиб қолиши унинг дастлабки аломатларидир.

Полиомиелит бедаво, уни фақат эмлаш орқали олдини олиш мумкин. Бир неча маротаба юборилган вакцина болани деярли бутун умри давомида ҳимоя қилади.

Эслатиб ўтамиз, Ўзбекистон болаларни полиомиелитдан ҳимоя қилиш мақсадида 2018 йилда 4 ойлик болаларга қилинадиган инактивлаштирилган полиомиелит вакцинаси (ИПВ) татбиқ этилганди.