ДХХ ва Иқтисодий жиноятларга қарши курашиш департаментининг Тошкент шаҳар бошқармаси ходимлари Тошкентда халқаро автобуслар қатновини йўлга қўйиб беришни ваъда қилиб, 5000 доллар пора олган шахс ушланди, деб хабар беради «Xabar.uz».
Маълумотларга кўра, Транспорт вазирлиги таркибидаги «Узавтотранс сервис» МЧЖда бўлим бошлиғи лавозимида ишловчи Т.А. Россия фуқароси бўлган А.В.га тегишли халқаро йўловчи ташиш билан шуғулланувчи МЧЖ автобусларининг Тошкент–Самара шаҳарлари ўртасида чартер қатновларини йўлга қўйиш учун мансабдор танишлари орқали ёрдам беришни ваъда қилган. У ўз хизмати эвазига 2020 йилнинг июль ойида ундан 5000 доллар олган.
Бироқ Т.А. ваъдасининг устидан чиқа олмагач, пулнинг 2700 долларини қайтариб, турли баҳоналар билан қолган 2300 долларини бермай келган.
Алданганини тушуниб етган жабрланувчи ҳуқуқ-тартибот идораларига мурожаат қилган.
Ўтказилган тезкор тадбир давомида Т.А. муқаддам олган пулининг 300 долларини қайтариб берган вақтида ашёвий далиллар билан ушланган. Ҳозирда унга нисбатан Жиноят кодексининг 168-моддасига (фирибгарлик) мувофиқ жиноят иши қўзғатилиб, тергов ҳаракатлари олиб борилмоқда.
Аввалроқ Бухорода Россияга бориш учун сохта авиачипта тайёрлаш билан шуғулланган икки кишига жиноят иши қўзғатилгани тўғрисида хабар берилганди.
Изоҳ (0)