Бошпанасиз эркак Жонни Деппнинг Лос-Анжелесдаги уйига кириб олди. У ўзига ичимлик тайёрлаб, душ қабул қилган

Америкалик актёр Жонни Деппнинг Голливуд-Хиллздаги уйига бошпанасиз эркак яширинча кириб олди, деб хабар беради Esquire.

Эркакни орқа ҳовлида бассейнда актёрнинг қўшниси пайқаб қолиб, полиция чақирган. Шундан сўнг, нотаниш кимса дарвозадан ошиб ўтиб, Деппнинг уйи қаршисида пайдо бўлган.

Полицияга иккинчи қўнғироқни хавфсизлик хизмати ходимлари амалга оширган бўлиб, улар уйга нотаниш кимса кирганини маълум қилган. Полициячилар етиб келганида эркак актёрнинг уйидаги ваннада душ қабул қилган ва чиқишдан бош тортган. Бунга қадар у актёрнинг баридан фойдаланиб, ўзига ичимлик тайёрлаган.

Эркак полициячиларнинг талабини бажармагани ва улар эшикни бузишга мажбур бўлгани учун жиноий жавобгарликка тортилган.

TMZ порталининг ёзишича, январь ойида полициячилар Деппнинг уйига киришга уринган бошпанасиз аёлни қўлга олган. У ўзганинг уйига ўғирлик мақсадида бостириб кирганликда гумонланган.

Аввалроқ бошпанасиз эркак рэпер Эминемнинг уйига бостириб киргани ва уни ўлдирмоқчи бўлгани тўғрисида хабар берилганди.