«Муҳташам юз йил» сериали юлдузи Марям Узерлининг севги тарихи ва бўлажак турмуш ўртоғи ҳақида маълумотлар

Актриса Марям Узерли узоқ вақтдан бери шахсий ҳаётини жамоатчиликдан яшириб келаётган эди. Аммо куни кеча актрисанинг 7 ёшли қизи Лара барча сирларни фош қилди, деб хабар бермоқда «Wday.ru» нашри.

Хуррам Султон ролини ижро этган «Муҳташам юз йил» юлдузининг шахсий ҳаётини ҳаммадан яширишига сабаб актриса бундан аввал севгидан «куйган». Гап унинг собиқ турмуш ўртоғи туркиялик бизнесмен Жан Аташ ҳақида кетяпти.

Жан ва Марям «Муҳташам юз йил« сериалининг суратга олиш жараёнида танишган. Хушбичим Жан Марямга шунчалик парвона бўлганки, ниҳоят актриса унинг севгиси олида таслим бўлган. Аммо уларнинг «бахтга кўмилган» даври тугаганидан кейин ҳамма нарса ўзгарди. Аташ ҳақиқий зўравон бўлиб чиқди: у актрисани доимий равишда асоссиз айблаб, унинг экранда ҳам, ҳаётда ҳам ҳеч нарсага арзимаслигини айтиб, камситиб келган.

Марям Узерли ҳомиладорлиги маълум бўлганда эса уни ташлаб кетган. Бундан аввал актрисадан анча катта миқдорда пул олган эркак аслида кредиторлар томонидан қидирилаётган фирибгар бўлиб чиқди.

Бундай ишқий романдан кейин Узерли анча вақтгача эркакларга ишонмай, 7 ёшли қизи Ларани ёлғиз ўзи вояга етказди.

Аммо 2020 йилда «Муҳташам юз йил» юлдузининг мухлислари актрисанинг ҳомиладорликнинг бешинчи ойида эканнини билиб ҳайрон қолишди. Бу узоқ вақт давомида ҳеч кимга айтилмаган сир бўлиб, бу сафар Марям чиндан ҳам бахтли эди.

У севгилисининг кимлигини сир сақлашга ҳаракат қилди, аммо мухлислар барибир бу инсон кимлигини билиб олди. Уларнинг айтишича, бу одам америкалик, жуда бой ишбилармон бўлиб, иш юзасидан тез-тез Берлинга бориб турган ва ўша ерда актриса билан танишган.

Танишув билан бошланган севги охир-оқибат жиддий муносабатларга айланди. 2021 йил бошида Узерли иккинчи бор она бўлди.

Сал кейин катта қизи Ларанинг туғилган кунида Марям биринчи бор бўлажак турмуш ўртоғининг суратини кўрсатди. Эркак карнавал костюмида эканни учун юзи деярли кўринмаган бўлса-да, лекин мухлислар бу одамнинг расмларини аввал ҳам кўришганини муҳокама қила бошлади.

Марямнинг ижтимоий тармоқда яна бир саҳифаси бўлиб у ерга актриса оқ-қора рангдаги замонавий фотосуратларини жойлайди. Бир неча йил олдин ушбу саҳифада сирли эркак пайдо бўлганди.

Ва ниҳоят актрисанинг етти ёшли қизи Лара жуфтликнинг сирини фош қилди. Қизча Instagram’даги ўз саҳифасига ёқимли оилавий суратни жойлади. Расм дарҳол ўчирилган бўлса-да, аммо тарқалишга улгурди.

Мухлислари Марям ниҳоят ўз бахтини топди, деб умид қилмоқда. Актрисанинг айтишича, карантин тўлиқ бекор қилингандан сўнг, жуфтлик ўзлари истаганидек ҳашаматли тўй маросимини ўтказишни режалаштирган.

Бундан аввал Марям Узерли Мексика сериалида суратга тушишни режалаштираётгани ҳақида хабар берилган эди.