ЮНЕСКО бош директори Одре Азуленинг таъкидлашича, 2030 йилгача дунё 40 фоиз миқдорда сув танқислиги муаммосига дуч келади. Бу ҳақда «Korrespondent.net» хабар берди.

Фото: Unsplash

Унинг сўзларига кўра, сув танқислиги билан боғлиқ вазият бошқа глобал муаммолар, шу жумладан, пандемия оқибатлари туфайли янада оғирлашади.

Азуленинг таъкидлашича, дунё сув ресурсларини тежаш учун етарлича чора кўрмаяпти ва энди уларнинг қийматини тўғри баҳолаш масаласида кескин савол пайдо бўлади.

«Сув бизнинг энг қимматли бойлигимиз, икки миллиарддан ортиқ одам тўғридан-тўғри эриша олмайдиган ‘мовий олтин’. У нафақат яшаб қолиш учун керак, балки инсон жамиятларида санитар, ижтимоий ва маданий роль ўйнайди», — деб таъкидлади ташкилот раҳбари.

Мақбул сиёсат вариантларини аниқлаш учун Одре Азуле масалага сув ресурсларининг турли жиҳатларини кўриб чиқишга имкон берадиган комплекс ёндашувни ишлаб чиқишни таклиф қилди.

Аввалроқ БМТ бош котиб Антониу Гутерриш шошилинч чоралар кўрилмаса, дунё бўйлаб миллионлаб одам очарчилик ёқасига бориб қолиши мумкинлиги ҳақида огоҳлантирган эди.