Москвада 13 йил гаражда ҳаракатсиз сақланган «ВАЗ-2107» сотувга қўйилди. Одометрида 400 километр масофа босгани кўрсатилган седан идеал ҳолатда сақланган бўлиб, сотувчи унинг учун 1 миллион рубль (13,5 минг доллар) сўрамоқда, деб хабар беради Motor.
Эълондаги машина рақамида кўрсатилган 174 сони унинг Челябинскда минилганидан далолат берса-да, «ВАЗ-2107» Москвада сотувга қўйилган. Автомобилга ҳозирга қадар икки киши эгалик қилган: биринчи бор седан 2008 йилнинг апрелида ҳисобга олинган ва унинг ҳозирги эгаси машинани 2010 йил июлдан бери сақлаб келади.
Машина кузовидаги завод маркировкалари ва салондаги қора целлофан қопламалар унинг минимал даражада минилганидан далолат бериши мумкин. Сотувчи автомобилнинг юриш қисми ва одометри суратлари билан бўлишмаган.
Сотувга қўйилган нусха кечроқ ишлаб чиқарилган модель бўлганлиги сабаб унинг капоти остидан 74 от кучига эга «ВАЗ-21067»нинг 1,6 литрли 8 клапанга эга инжектор двигатели ўрин олган. Узатмалар қутиси — беш поғонали механик. Седаннинг бошқа ҳеч қандай ўзига хос опциялари йўқ.
Аввалроқ Россияда саккиз йил давомида реставрация қилинган 55 йиллик «Волга», 41 йиллик «ЗИЛ» лимузини BMW 7-Series Long нархида сотувга қўйилгани тўғрисида хабар берилганди.
Изоҳ (0)