Фарғона шаҳридаги марказий кўчаларнинг бирида бензин ташувчи машина («бензовоз») ҳамда Cobalt иштирокида авария содир бўлди, деб хабар беради Telegram’даги «Эхо Узбекистана» канали.

Эълон қилинган суратлардан кўриш мумкинки, «бензовоз» йўлни иккига ажратиб турувчи бетон тўсиқ устига чиқиб кетган, Cobalt’нинг олд қисми эса пачоқланган.

«Mediapark томонидан келинганида светофор ўчиб-ёнмайди (таймери йўқ). Бу тарафдан келувчиларнинг барчаси ўтиб кетиш учун ‘учиб’ келади. Оҳунбобоев мавзеси томонда эса стоп-чизиқ деярли ҳалқа йўлининг кесишмасида. Озгина ҳаракатлансанг, ҳалқа йўли бўйлаб ‘учиб’ келаётганларнинг йўлини тўсиб қўясан. Мавзе томондан келаётганларга таймер қизилга қанча вақт қолганини кўрсатади ва ҳайдовчилар сариқ чироқ ёниши билан ҳаракатга тушади (бурчакдаги коллеж биноси ҳам Mediapark томондаги йўлнинг кўринишини тўсиб туради). Бу вақтда эса Mediapark томонидан келаётганлар светофор қачон яшилдан сариққа ёнишини билмайди ва сариқ чироқ ёнганида тўхтамай ўтиб кетади…

Аварияга мазкур ҳолат сабаб бўлмаган бўлса-да, бу кўплаб аварияли ҳолатларни юзага келтиради», — деб ёзади фарғоналик ҳайдовчилардан бири.

Унинг сўзларига кўра, Оҳунбобоев мавзеси томонидан ҳаракатланганда светофорнинг қизил чироғи ёнса ҳам, ўнг томонга бурилишга рухсат берилган. «Суперҳайдовчилар» эса аввалига машиналарни ўтказиб юбориб, кейин бурилиш ўрнига асосий йўлда кетаётгандек ҳаракатланади.

«ЙТҲ ходимлари авариянинг асл сабабини аниқлашига ва барча мавжуд имкониятлардан фойдаланиб, ушбу чорраҳанинг хавфсизроқ бўлишини таъминлашларига умид қиламиз», — дейилади хабарда.

ИИВ ЙҲХББ ахборот хизматининг маълум қилишича, авария 22 март куни соат 09:50 ларда Фарғона шаҳридаги Ислом Каримов ва Кичик ҳалқа автомобиль йўли кўчалари кесишган чорраҳада содир бўлган.

Фарғона—Қувасой йўлининг 1-километрида содир бўлган мазкур йўл-транспорт ҳодисаси оқибатида Cobalt’нинг 1997 йилда туғилган ҳайдовчиси Р.Ф. тан жароҳати билан шифохонага ётқизилган.

Ҳолат юзасидан Фарғона шаҳар ИИО ФМБ ЙҲХБ томонидан суриштирув ишлари олиб борилмоқда.