Туркия Европа Кенгашининг аёлларга нисбатан зўравонликнинг олдини олиш ва унга қарши кураш ҳақидаги конвенциясидан чиқишини эълон қилди, деб ёзади Meduza мамлакат президентининг тегишли фармонига таяниб.
Айни вақтда Туркия вице-президенти Фуат Октай Анқара аёллар ҳуқуқларини ҳимоя қилишга қаратилган курашни давом эттиришини маълум қилди.
Ражаб Тоййиб Эрдўғон ҳужжатни имзолагандан кейин, 20 март куни Туркияда минглаб одамлар норозилик намойишларига чиқди ва президентдан ўз қарорини бекор қилишни талаб қилди. Бундай акциялар Истанбул, Анқара ва Измирда бўлиб ўтди.
Евроиттифоқнинг ташқи ишлар ва хавфсизлик сиёсати бўйича олий вакили Жозеп Боррел Туркияни Истанбул конвенциясидан чиқиш қарорини қайта кўриб чиқишга чақирди. У Туркия ҳукуматининг қарори юзасидан афсус билдирди ва буни тушунмаслигини айтди.
«Аёллар ва қизларга нисбатан зўравонликка қарши кураш бўйича ортга чекиниш эмас, етакчилик кўрсатиш вақти келди. Шунинг учун биз Туркия ҳукуматининг ҳатто Истанбул номи берилган ушбу конвенциядан чиқиш қарорига нисбатан афсус билдирмасдан иложимиз йўқ… Биз Туркияни ўз қарорини бекор қилишга чақирмасдан тура олмаймиз», — дейилади Боррелнинг баёнотида.
Аёллар ҳимоясига қаратилган конвенция 2011 йилда Истанбулда қабул қилинган (шунинг учун у Истанбул конвенцияси деб ҳам аталади) бўлиб, уйдаги зўравонликка қарши кураш бўйича Европадаги биринчи келишувга айланган. Туркия мамлакатлар ичида биринчи бўлиб ушбу ҳужжатни ратификация қилди. Конвенцияни 40 дан ортиқ мамлакат имзолаган.
Истанбул конвенциясига кўра, руҳий, жисмоний ва жинсий зўравонлик, мажбурий тарзда амалга оширилган аборт, никоҳ ва стерилизация, шунингдек, жинсий тегажоғлик жиноят ҳисобланади.
Изоҳ (0)