Франция бош вазири тўғридан-тўғри эфирда коронавирусга қарши AstraZeneca вакцинаси билан эмланди

Франция бош вазири Жак Кастекс COVID-19 коронавирусига қарши AstraZeneca вакцинаси билан эмланди. Бу ҳақда BFM телеканали хабар берган.

55 ёшли Кастекс вакцинанинг биринчи дозасини Париж яқинидаги Вал-де-Марн департаментида жойлашган Бежен ҳарбий госпиталида 19 март куни қабул қилган.

https://twitter.com/BFMTV/status/1372912067666194433

Аввал Франция ҳукумати раҳбари AstraZeneca вакцинасига ишончини намойиш қилиш учун барчанинг кўз ўнгида мазкур препарат билан эмланишга тайёр эканини маълум қилганди.

Эслатиб ўтамиз, Европа Иттифоқига аъзо мамлакатларда AstraZeneca вакцинаси билан аҳолини эмлаш тўхтатиб қўйилган. Жумладан, Германия, Италия, Испания, Латвия, Литва, Дания, Кипр, Болгария, Норвергия, Нидерландия, Исландия ва Францияда мазкур препаратни қўллаш чекланган. Бироқ кейинчалик Европа давлатларида препаратдан фойдаланиб аҳолини эмлаш қайта бошланган. Хусусан, Францияда 19 мартдан бошлаб AstraZeneca вакцинасидан фойдаланишга яна рухсат берилган.