Буюк Британиянинг Миллий космик кенгаши 2021 йил мобайнида биринчи миллий космик стратегияни ишлаб чиқади, стратегия, хусусан, космик қўмондонликни таъсис этиш ва мамлакатдан сунъий йўлдошларни учириш имкониятларини ривожлантиришни назарда тутади. Бу ҳақда Буюк Британия мудофаа ва ташқи сиёсатининг умумий шарҳида маълум қилинди, деб ёзади «Интерфакс».
Таъкидланишича, 2021 йилга мўлжалланган миллий космик стратегия «ҳарбий ва фуқаролик космик сиёсатига комплекс ёндашувни» мустаҳкамлайди. Унинг бир қисми сифатида 2021 йилнинг ёзига қадар «Буюк Британия қуролли кучлари мамлакат манфаатларини ҳам Ерда, ҳам коинотда илгари суриши учун илғор имкониятларга эга бўлиши учун» янги космик қўмондонликни ташкил этиш режалаштирилмоқда.
2022 йилга қадар Буюк Британия ҳудудидан — Шотландиядан сунъий йўлдош учириш имкониятларини ривожлантириш режалаштирилган. «Бу бизга Буюк Британия коинотга нимани ва қачон юбориши тўғрисида янада стратегик мухторият ва мослашувчанликни беради», — дея таъкидланади шарҳда.
Шунингдек, мамлакат мудофааси ва сиёсатининг умумий шарҳига кўра, Британия ядро салоҳиятини 40 фоизга оширмоқчи. Гап ўттиз йил давом этган босқичма-босқич қуролсизланиш тугаганини кўрсатувчи «Трайдент» ядровий жанговар каллаклар сонини 180 тадан 260 тага етказиш режалари ҳақида бормоқда.
Таъкидланишича, ушбу стратегия хавфсизлик муҳитидаги ўзгаришлар ва кенг кўламли технологик ва ақидапарастлик таҳдидларнинг мавжудлиги натижасидир. Айни пайтда, фаоллар огоҳлантиришича, Буюк Британия COVID-19 пандемияси билан курашиш учун маблағга муҳтож бир пайтида янги қуролланиш пойгасини бошлаш билан ўзини хавф остига қўймоқда.
Аввалроқ Франция биринчи марта коинотда ҳарбий машғулотлар ўтказа бошлагани ҳақида хабар берилганди. Ўқув машғулотлар 1965 йилда учирилган биринчи француз сунъий йўлдошига бағишланиб, AsterX деб номланди. Машғулотлар пайтида ҳарбийлар ўта хавфли космик объект ва Франция сунъий йўлдошига нисбатан таҳдидларни кузатиб бориши айтилган.
Изоҳ (0)